Leipzig tan Szoboszlai

Zirtawpni zan Bundesliga inkhelah RB Leipzig-in Stuttgart 4-0 in an sawp a, Red Bull Arena Leipzig-ah hian Dominik Szoboszlai-a'n goal hnih khungin Emil Forsberg leh Andre Silva ten goal khat ve ve an khung belh.

Kum 20 mi Szoboszlai hi Hungary player chhuak tharah chuan a ṭha ber anga chhal ngam a ni. RB Leipzig hian kumin January khan Red Bull Salzburg aṭangin euro maktaduai 20-in an lalut a, Hungarian player manto ber ni hial.

Amaherawhchu inhliam vangin season liam ta khan Szoboszlai hi a inlan lo a, Euro 2020-ah pawh koh ni mah se a tel thei ta lo. RB Leipzig tana Szoboszlai a khelh hmasak ber chu tun season ṭantirh kha niin August 7 khan DFB-Pokal-ah SV Sandhausen an hmachhawn a, bench aṭanga lutin goal a khung.

Inrinni khan Stuttgart lakah a vawi khat nan Leipzig tan inkhel bul a ṭan a, Leipzig-in an lakluh aṭanga ni 224 na niin goal hnih a khung nghal a, goal ṭha ve ve a ni. Goal hmahruai hi box chhung aṭanga a shot goal a hi a, goal hnihna hi freekick aṭangin danglam takin a khung.

Mual sir aṭangin Szoboszlai hian freekick a pet a, goal-ah pet thlawk pheiin tumahin an tauh fuh lo a, goal-ah a lut tlang. Suttgart keeper Florian Muller-a'n Szoboszlai-a freekick hi a en liam.