Grifo freekick hmangin Freiburg-in Dortmund an hneh

Marco Rose kaihhruai Borussia Dortmund-in match hnih chauh an la khel chungin hneh loh an tawng der tawh. Inrinni khan Dortmund hian Dreisamstadion an tlawh a, mualneitu Freiburg lakah 2-1 in an tlawm.

Freiburg tan hian Vicenzo Grifo-a'n ṭha zetin freekick aṭangin a khung a, Rolland Sallai-a'n a khung ve bawk. Dortmund goal awmchhun hi Freiburg defender Yannik Keitel-a'n an lama a tihluh a ni.

Dortmund an tawlhthlu
Borussia Dortmund-in league match hmasa berah Eintracht Frankfurt 5-2 in an sawp a, hemi hma hian DFB Pokal-ah Wehen Wiesbaden chu 3-0 in an sawp bawk. DFL-Supercup-ah Dortmund hian Bayern Munich hneh lo mah se an khelh ṭhat tho avangin Freiburg lakah hian point thum hmu tur an ni.

Dreisamstadion-ah Dortmund-in bul an ṭan ṭha tawk lo a, an fimkhur loh avangin minute rukna lekah freekick an chawi. Yard 30 vel zeta hla a nih avangin goal khung theihna tur niin a lang lo a, Grifo erawhin goal-ah petin goal ban fuhin a kual lut.

Kum 28 mi Grifo hi Germany a piang ni mah se a nu leh pa te Italian a nih avangin Azzuri tana inkhelh a thlang zawk. Freiburg-in goal khung theina chance ṭha dang pawh an nei a, amaherawhchu South Korean forward Jeong Woo-yeong-a'n hnai tak aṭangin a hlah.

Second half ṭantirhah Freiburg bawkin bul an ṭan ṭha a, Roland Sallai-a'n a chance ṭha mah se a hlah hnuah minute 53-ah passing hmanga Dortmund tlarhnung ṭhiatin chiang takin a pet goal.

An nawr na tawk lo
Borussia Dortmund tan Jude Belllingham a khel ṭha leh a, English midfielder hian minute 10-na lekah box chhungah ṭha takin lalut mah se a ball pet chu keeper Mark Flekken-a'n a dansak. Second half-a Dortmund goal khungnaah pawh Bellingham hi a inrawlh leh bawk.

Minute 59-naah German right back Felix Passlack cross chu Bellingham-a'n pet fuh lo mah se insa seng hman lo Freiburg defender Yannik Keitel-a'n an lamah a ti lut. Borussia Dormtund-in sipurh sutna turin hun tam nei mah se Freiburg tlarhnungin Erling Haaland leh Dortmund tlarhma an dah ṭha.

Marco Rose-a'n bench aṭangin Julian Brandt, Emre Can leh Mats Hummels te luhtir mah se Freiburg tlarhnung an ṭhiat thei lo a, result a danglam phah lo. Dortmund hian August 27, Zirtawpni zan dar 12:00-ah Hoffenheim an mikhual ang.