Minister-in NSS hnenah chawimawina a hlân
Asian football-a club inelna sang ber dawttu AFC Cup aṭangin Bengaluru an tla a, ATK Mohun Bagan tan knockout round lut turin inhnehtawk chiah a tawk tawh thung.
Bengaluru hian Inrinni tlai khan Bashundhara Kings chu goal khung loin an inhnehtawkpui a, Mohun Bagan-in Maziya S&RC chu 3-1 a an hneh zui avangin Bangalore club tan Asian football-a an zinkawng a tawp zui.
AFC Cup-ah hian group hmahruaitu chiahin knockout round hi an lut dawn a, Bengaluru hian Thawhlehni zan dar 9:30-a an match hnuhnung berah Maziya hneh pawh ni se point li chiah an neih dawn avangin an tlang thei tawh lo.
Mangṭha Bengaluru
Bengaluru hian an match hmasa berah Bagan chu 2-0 in an ngam lo tawh a, knockout round luh beiseina nei turin Bangladesh club Bashundhara lakah chak ngei an mamawh.
Mahse, Bangalore club hian inkhel an thunun chungin goal an khung thei lo a, vawi 14 zet shot an neih zinga pathum chiah target-ah a kal - a tawpah 0-0 a an lungawi a ṭul a, group stage-ah AFC Cup an mangṭha.
Bengaluru captain Sunil Chhetri chuan, "AFC Cup hmachhawn tura kan inbuatsaih dan ka thlirin inelna kan mangṭha dan hi a lawmawm lo hle. Kan chance neih zozai kha khung thei ila chu inkhel result kha a danglam tur. Mahse, a nihna angin kan pawm a ngai a, he result hi inzir nan kan hmang ang," a ti.
Bagan hmabak a êng
Kolkata club-in Bengaluru an hneh hnuah an ti mai mai lo tih pholangin Maziya chu 3-1 in an hneh leh a, Maldives club tan Aisam Ibrahim chuan goal hmahruai khung mah se Liston Colaco, Roy Krishna leh Manvir Singh hmangin an chhanglet a, a tawpah an chak.
Bagan hian Thawhlehni tlai dar 4:30-ah Bashundhara an hmachhawn ve leh dawn a, point ruk an neih tawh avangin Bangladesh club lakah point khat an hlawh chhuak thei a nih chuan knockout round an lut ang - Bashundhara hian point li an nei mek thung.
ISL club coach Antonio López Habas chuan, "Point ruk kan nei a, kan group-ah heti zat point nei thei dang an awm lo. Draw result nei thei kan ni a, mahse, keini chuan chak kha kan tum tlat - kan inkhel leh tur atan pawh chu chu kan tum dan tur a ni," tiin a sawi.