FIFA-in Afghan hmeichhe footballer-te a ngaihven

Football khawvela thuneitu sang ber FIFA chuan Afghanistan hmeichhe footballer-te sahimna tur ngaihtuahin khawvel ram sorkar ṭhenkhatah lehkha an thawn a, Afghan hmeichhiate an him theihna tura Afghanistan aṭanga lakchhuah dan tur ngaihtuah pui turin an ngen.

Taliban firfiakten Kabul khawpui an lak hnuah Afghanistan tana lo inkhel tawh hmeichhe footballer-te hlauhthawnnain an khat - a chhan langsar tak chu Taliban-ten hmeichhe football khelh an phal loh ṭhin vang a ni.

Khawvela footballer intelkhawm pawl FIFPro pawhin hmeichhe footballer-te himna tur ngaihtuahin, "A tam thei ang ber him dam taka hruaichhuah hi kan tum ber chu a ni," an ti.

An biru!
Kartir khan Afghanistan national women's team captain hlui Khalida Popal chuan infiamna khawvela thuneitute chu hma la turin a lo ngen tawh a, "An sahimna tur min ngaihtuahpui hram rawh u," a ti a, Taliban rorelna hnuaia hmeichhe footballer-te a ngaihtuah hle.

Taliban-in Kabul khawpui an lak hnuah hmeichhe footballer tam tak chu an biru nghal a, kum 2007-a Afghanistan national women's team din a nih dawna hma la nasa tak Popal chuan, "Ka mu thei lo a, tih theih nei loin ka ṭap reng ringawt mai a ni," a ti.

Kum 20 bawr vel liam taa Taliban-ten ro an rel hmasak khan hmeichhiate chu lehkha an zir phalsak an ni lo a, chhungkuaa mipa tel loin an chhuah phal a ni lo a, hnathawh phalsak an ni lo a, an taksa chu burqa-in an hliah vek tur a ni bawk - he rorelna dal apiang chu na takin an hrem ṭhin a ni.

Thih hmabak?
Afghan hmeichhe team assistant coach hlui Haley Carter chuan a player hlui ṭhenkhat nen an inbiakpawh thu a sawi a, a player hluite chu manchhuah an nih chuan tihhlum theih mai dinhmuna an din thu a sawi!

Carter chuan, "Pawn lam mi min bia tih an hriatchhuah chuan an dinhmun a hlauhthawnawm lehzual dawn," a ti a, a player biak pakhat chuan, "Taliban ho hian hmeichhiaten football an khelh an duh lo a, min that dawn a ni, kan dinhmun a him lo takzet," tiin a hrilh niin a sawi bawk.

US Marine officer hlui ni bawk Carter chuan player-te chu fimkhur taka awm turin a chah a, infiamna khawvela thuneitute chu hma la chak turin a ngen bawk.

FIFA thupuangtu chuan, "Afghanis-tan Football Federation leh thawhpui dangte nen inbiakna kan nei reng a, an rama player-te dinhmun min hrilh zel a ni," tiin hmalakna an kalpui mek thu a sawi.