French Cup final entu awm mai thei

French Football Federation (FFP) chuan French Cup khelh an tum dan an sawi a, a hmunah entu an awm mai thei. Hei erawh ruahmanna mai a la ni a, sorkar lam thu an ngaihchan tel a la ngai dawn.

Covid-19 vangin Ligue 1 chu April thla khan tihtawp fel a lo ni tawh. Cup inelna pahnih erawh a hmawr bawk a la ni lo. Paris Saint-Germain leh Saint-Etienne ten French Cup final an khel ang.

French Cup bakah hian League Cup khelh hmabak an la nei bawk, hetah erawh PSG leh Lyon an inhmachhawn thung ang. Inelna pahnih hi Paris khawpuia awm mipui 80,000 lenna Stade de France-ah khelh tur a ni.

FFP president Noel Le Graet chuan, "Sorkar lam nen inbiakna kan nei chho mek, final pahnih hi a hmunah entu awm thei ngei se ka duh. Stadium khat tlata punkhawm a rem lo a nih pawhin mi ṭhenkhat tal an luh theih nan hma kan la.

"Season thar khelh ṭan dan tur pawh ngaihtuah tel a ni, a tir lamah chuan stadium khata entu awm nghal theih chu a rinawm loh. Season ṭan hun sawn tlai emaw, a khelh dan phung siamrem hret emaw chu a ngai dawn," a ti.