Court-ah Lyon an zualko

Lyon chuan French Ligue 1 khelh chhunzawm leh ngei an duh a, league an khelh zawm leh theih nan court-ah an zualko. Club president Jean-Michel Aulas chuan an dikna chanvo hmuh ngei an tum thu a sawi.

Covid-19 vangin Ligue 1 hi March thla aṭang khan an chawl lailawk, April thla tawp khan French Football Federation chuan league hi titawpin hmahruaitu leh champion lai ni bawk Paris Saint-Germain hnenah nomawi an hlan.

League an tihtawp hian Lyon chu European football khel phak zingah an awm lo, season tam tak hnuah Europe-ah an inlan thei dawn lo a ni. Lyon bakah hian club ṭhenkhat chuan an lungawi lohna chu court-ah an thlen tawh bawk.

Lyon president Aulas chuan, "Germany-ah chuan an inkhel leh tawh, Spain-ah pawh tun thla chhungin an inkhel leh dawn. Ram dangah pawh chanchin a ṭha lam zel hriat a ni a, heng ramah te hian hripui a leng ve tho.

"League tihtawp a ni mai kha mak ka ti a, club lam rawnna mumal pawh a awm lo. Khelh hmabak match 10 kan la neih hi fimkhur tak leh invenna ṭha tak hnuaiah khelh chhunzawm leh ngei ni se tih hi kan duhdan a ni," a ti.