US Open khelh a harsa ang - Djokovic

Novak Djokovic chuan tuna US Open khelh an tum dan phung chu a khirhkhan lutuk tih a sawi a, ruahmanna an neih dan chu player tan zawm a harsat a rin thu a sawi bawk.

US Open hi August 31 aṭangin New York khawpuiah khelh tum a ni, ruahman dan chuan inelna neih hma hian player-te chu ni 14 khung hran hmasak tur an ni a, player pakhatin amah ṭawiawm turin midang pakhat bak a hruai tel thei dawn lo.

World number 1 Djokovic chuan, "Inelna neihna tur hmunpui Manhattan-ah kan luh phal a ni nghal dawn lo, airport-a hotel-ah kan riah a ngai dawn; kar khat chhungin coronavirus kan kai em tih vawi hnih endik kan ni dawn bawk.

"Midang pakhat chauh hruai theih tih chu thil tih theih loh a ni, coach kan mamawh, a bakah fitness trainer leh physiotherapist te pawh an awm ngei a ngai bawk," tiin United States Tennis Association lamin ruahmanna an siam chu a sawisel.

US Open vawi thum champion tawh Djokovic chuan sawi zawmin, "Tennis thuneitu sang lam nen kan inbe fo, kan sawi tam ber chu US Open khelh theih dan tur phung a ni. Inelna buatsaihtu lamin inkaihhruaina an siam hi chu kan zah tur a ni. Amaherawhchu, dan zawm tur hi a khirh lutuk deuh a ni," tiin a sawi.

World number 2 Rafael Nadal pawhin tun dinhmunah chuan New York khawpuiah inkhel tura zin luh a duh rih loh thu a lo sawi tawh bawk. Hard court inelna lian hi an sawn emaw, an khelh dan phung tur an tih danglam emaw chu a ngaih hmel hle.

Kuminah hian Grand Slam khelh tur pali zingah Australian Open chiah an la khel. Wimbledon an ṭhulh tawh a, US Open leh French Open khelh an la beisei mek.