MSL6 league round an khel zo BCA, Vikings, TBL leh TSBC an tlang
Mizoram Super League season 6 league round chu nimin tlai khan khelh zawh a ni a, champion lai Zarkawt BCA, Chanmari Vikings, Khatla TBL leh Tuikual South ten semifinal an lut. Ramhlun Sporting Club leh Chawnpui Basketball Club ten relegation playoff an khel thung ang.
Thawhṭanni zan khan Hawla Indoor Stadium, Republic Vengthlangah Chanmari Vikings leh Tuikual ten chungnung zawk nih an inchuh a, inkhel hmuhnawm takah Vikings lamin 94-70 a hnehna changin table-ah pahnihna dinhmun an luah.
Vikings tan Raymond
Tuikual South thiampuipa Darrel Steven Bowie a haw tawh a, season hmasa finalist hian tualchhung player hlangin khel mah se hun chanve hmalamah chuan an chungnung zawk, half time laiin 50-46 in hma an hruai.
Mahse, third quarter bikah Vikings lamin point 22 an neih belh laiin TSBC lamin point sarih chauh an neih belh a, quarter hnuhnung berah Vikings bawk an chungnung zui leh avangin chiang takin hnehna an chang.
Chanmari Vikings tan nidang ang bawkin Raymond Miller Jr. chu player ṭangkai leh thawhhlawk ber a ni leh, American player hian point 39 a neih bakah rebound vawi 29 ngawt a la, double-double neiin a team a chakpui.
Raymond hi MSL season kal laia player malkhaia hmuhnawm bera chhal ngam a ni, a match hmasa bera Khatla TBL a hmachhawn ṭumin point 28 a nei a, a hnu lamah erawh match li chhung chu a zawnin point 30 chuang a nei thei ziah.
Coach an lungawi
An elpui hneh chungin Chanmari Vikings an tlang avangin coach a lungawi hle. H. Lalhruaitluanga chuan, "Match hmasa lama kan tihsual leh fuh tawk lo deuh kan inhrilh a, kan insiamṭhat theih avangin tun ṭumah chuan a chak zawkah kan ṭang," tiin Vanglaini a hrilh.
Mission Veng tlangval Ahruaia chuan sawi zawmin, "MSL season kan hman tawh hoah chuan player kan chah luh ho intluk tlan ber ṭum a ni a, a boruak pawh a nuam chho viau turah ka ngai. Mahse, hri leng vanga inelna a kaltluang thei lo erawh a pawi ka ti hle," a ti.
Chak lo mah se Tuikual South an tlang tho. Phengphehlep coach C. Lalrohlua chuan, "Kan game hi hriatthiam a har rih deuh, player pawimawh Darrel a awm thei leh tawh lo a, a tel loa khel thut kan nih leh avangin kawng hrang hrangin kan che vel kha a fuh tawk lo.
"Chutihrualin semifinal kan lut dawn tih kan hriat chian vang kha niin ka hria player an ṭang tawk lo deuh, match hmasa kan khel nena khaikhin chuan player thothang a ṭha tawk lo deuh, inelna sang zawkah chuan a hma aiin ṭhain kan khel leh ang," tiin a sawi.
MSL6 League Round Results
February 25, Thawhlehni
Tuikual South 79 - 78 Chawnpui BC
February 27, Ningani
Zarkawt BCA 98 - 65 Ramhlun SC
February 28, Zirtawpni
Khatla TBL 96 - 83 Chanmari Vikings
Zarkawt BCA 87 - 85 Tuikual South
February 29, Inrinni
Chawnpui BC 82 - 88 Khatla TBL
March 3, Thawhlehni
Ramhlun SC 61 - 79 Chanmari Vikings
March 4, Nilaini
Khatla TBL 85 - 90 Zatkawt BCA
March 5, Ningani
Chanmari Vikings 110 - 84 Chawnpui BC
March 6, Zirtawpni
Tuikual South 66 - 77 Ramhlun SC
March 7, Inrinni
Chawnpui BC 81 - 112 Zarkawt BCA
March 10, Thawhlehni
Tuikual South 83 - 73 Khatla TBL
March 12, Ningani
Chawnpui BC 72 - 69 Ramhlun BC
March 13, Zirtawpni
Chanmari Vikings 68 - 77 Zarkawt BCA
March 16, Thawhtanni
Chanmari Vikings 94 - 70 Tuikual South
March 17, Thawhlehni
Ramhlun BC 71 - 85 Khatla TBL