2017 Laureus World Sportsman of the Year leh Comeback of the Year award dawngtu Roger Federer

Tennis inelna ngaihhlut ber Grand Slam nomawi vawi 20 zet chawi tawhtu, Roger Federer chu 2017 Laureus World Sportsman of the Year leh Comeback of the Year award hlan a ni.

Laureus Awards hi Thawhlehni zan khan a vawi 18 nan Monaco-ah sem a ni a, award ngaihhlut dawngtu kum 36 mi Federer hian nikum khan Australian Open leh Wimbledon nomawi a chawi a, kum sarih chhung zet major title a lak loh hnuah ropui takin a rawn let theih avangin Comeback of the Year hi ani aia dawng tur dang an awm chuang lo.

Nikum khan Jamaican sprinter ropui Usain Bolt-a'n Sportsman of the Year chawimawina hi a dawng a, ani hian vawi li a dawng tawh. Federer ni lo tennis player dang zingah Rafael Nadal leh Novak Djokovic ten an dawng tawh bawk.

Tennis star dang Serena Williams hnenah World Sportswoman of the Year award hlan a ni. World number 1 hlui Serena hian season hmasa khan a vawi 23 nan Grand Slam nomawi a chawi ve bawk a, Open Era chinah ani aia major title nei hnem an awm lo.

Federer a lawm
Swiss star Federer chuan, "Hetiang taka ka rawn kir leh thei hi chu ngaihruat thiam pawh a harsa, nikum zet kha chuan duhthusam kha a tak ramah a thleng dik a ni, ka tan chuan hei aia hlu a awm thei tawh chuang lo. A nihna taka chuan beiseina nei mah ila a thlen dik kha chu ka ring ngam bik lo.

"Rafael Nadal nen khan Grand Slam pali kha pahnih ve ve in kan insem a, ani hian he chawimawina hi dawng pawh ni se a mak lo ang. Rafa nen inelna hautak kan neih hnua hetiang chawimawina ka dawng thei hi ka tan chuan chawimawina a ni," tiin a sawi.

Tun season Grand Slam hmasa ber Australian Open chawi tawhtu Federer hian Laureus Awards hi vawi ruk a dawng tawh a, ani aia dawng hnem an awm lo–chutih rualin 2008 hnua a dawn lehna hmasa ber a ni thung.

Laureus World Sportsman of the Year chawimawina dawng turin Federer hian Real Madrid forward Cristiano Ronaldo, Britain long distance runner Mo Farah, cyclist Chris Froome, Formula 1 driver champion Lewis Hamilton leh tennis lama a elpui Rafael Nadal te a khum a ni.

Mercedes an chungnung
Season hmasa khan Mercedes chuan hnehsawh takin Formula 1 an thunun a, tuma chuh buai phak loin Formula 1 constructors' champion an ni–anni hnenah hian Team of the Year chawimawina hlan a ni.

Mercedes hian award dawng tura an khumte hi an theuneu lo hle, La Liga leh Champions League nomawi chawitu Real Madrid leh basketball inelna sang ber NBA champion Golden State Warriors te chungah an awm thei a ni.

Car intlansiakna sang leh ngaihhlut ber Formula 1 driver zingah Michael Schumacher leh Sebastian Vettel ten tun hmain chawimawina hi an dawng tawh a, world champion vawi li ni tawh Lewis Hamilton erawh Sportsman of the Year dawng thei tura chhawp chhuah ni mah se Federer a tluk lo thung.

Mittui karah
Brazilian football club Chapecoense hnenah Best Sporting Moment of the Year hlan a ni. 2016 Copa Sudamericana final khel tura kal Chapecoense hi an chuanna thlawhtheihna a chesual a, mi 77 zet an thi–an player zingah defender Alan Ruschel leh Helio Zemper te bakah reserve goalkeeper Jakson Follman chiah an dam chhuak.

Chhiatna vawrtawp an tawng a, an player ṭha rual an chan avangin Chapecoense fans an ṭap a, khawvelin a tawrhpui. Chapecoense hian hun thim hrehawm tawng mah se an beidawng lo, thla ruk hnuah an rawn kir leh thei a ni.

Award dang
Spanish golfer Sergio Garcia chuan a vawi hnih nan Laureus Award a dawng ve leh ta, Garcia hian tun hmain Laureus Newcomer a dawng tawh a, kum 18 zet a liam hnuah Breakthrough of the Year Award a dawng ve leh chiah. Chawimawina dawng tur hian 2017 Masters a la, Major Championship vawi 74 a khelh hnua a hlawhtlin lehna hmasa ber a ni.

Award dang nena khaikhin theih loh Laureus Academy Exceptional Achievement Award chu Italy leh Roma football legend Francesco Totti hnenah hlan a ni. Totti hian kum 22 football a khelh chhungin Roma lo chu club dang a nei lo a, 2006 World Cup-ah khan an ram a champion pui bawk.