Arsenal tan City laka phuba lak hun

League Cup final-ah Manchester City-in Arsenal sawpin Pep Guardiola hnuaia an nomawi hmasa ber an chawi. Gunners hian zanin dar 1:15 hian Emirates Stadium-ah Pep Guardiola naute bawk hi an mikhual leh dawn.

Premier League hmahruaitu Man City hian point 13 zetin hma an hruai fal tawh a, Arsene Wenger-a naute nen an inkarah point 27 zet a awm. London club tan nomawi ni loin Champions League khelh chu an tum ber a ni tawh a, amaherawhchu palinaa awm Tottenham Hotspur pawh point 10 zeta an phak tawh loh avangin chetsual a thiang tawh lo.

Beiseina
Arsenal hian palina ni tur hian champion lai Chelsea leh Tottenham an lehpelh a la ngai dawn a, kawng a harsa tawh takzet.

North London club hian City aiin player an nei ṭha lo zawk tih chu League Cup final-ah a chiang tawh, zanina an hmachhuan tur chu an khelmual record ṭha a ni ang. Tun season league match-a an mikhual zingah Manchester United chiah hneh loh an la nei a, an match hnuhnung berah Everton chu 5-1 in an sawp.

Gunners player zingah City an hneh loh ṭuma hnungzâng na Nacho Monreal bakah Alexandre Lacazette a la inkhel thei dawn lo a, midfielder Henrikh Mkhitaryan leh striker manto ber Pierre-Emerick Aubameyang ten bul an ṭan dun leh tura ngaih a ni - goalkeeper Petr Cech a inlan bawk ang.

Dan theih City
Man City hian tun hnaiah league match thum chhung chu khualmualah bikah hnehna an chang zo tawh lo, Liverpool an hneh loh bakah Crystal Palace leh Burnley te nen an inhnehtawk bawk. Etihad Stadium a nih loh chuan City hi team dang tan dan theih an ni.

Amaherawhchu, City hneh hi thil awlsam a ni lo. League goal 79 khung tawh City tan Sergio Aguero a vul mek a, tun hnaiah match an ngah avangin Pep-a'n Argentine striker aiah Gabriel Jesus a chhawr zawk a nih pawhin a mak lo ang.

Barcelona leh Bayern Munich a enkawl laia league nomawi chawi tawhtu Guardiola hi League Cup-ah chauh a lungawi dawn lo a, league lian pathuma champion theihna hun ṭha a neih avangin Gunners luhchhuah tumin thapui an thawh ngeiin a rinawm.