Thla ruk atan Nasri hrem

Manchester City midfielder hlui Samir Nasri chu a inenkawlnaah damdawi hman phal loh a hman avangin Europe-a football thuneitu sang ber UEFA chuan thla ruk chhung football kaihhnawiha inhnamhnawih thei lo turin an hrem a, kum 30 mi Nasri hian a duh chuan a khinglet thei ang.

Nasri hian January khan Turkish club Antalyaspor chhuahsanin club nei loin a awm mek a, kum 2016 khan Los Angeles-a a awm laiin a thlenna hotel-ah drip treatment a la. Mahse, World Anti-Doping Agency (WADA) dan kalh a lo nih avangin hremna a tuar dawn ta a ni.

Arsenal midfielder hlui Nasri hian dan a bawhchhia tih a inhre lo niin a lang a, amah enkawltu private medical company Drip Doctors chuan French midfielder an enkawl thu hi thlalak nen twitter lamah an pholang a, hetih hunlai hian Nasri hian Manchester City aṭangin Sevilla-ah loan-in a khel.

Nasri hian 2008-11 chhung khan Arsenal tan a khel a, City-ah pound maktaduai 25-a a pem hnuin Premier League nomawi pahnih a chawi a, season hmasa khan Sevilla-ah loan-in a khel. Tun season-ah Antalyaspor tan khelin thla ruk bak a daih lo.