Real hlim chhung a rei lo
Match nga chhung a zawna an chak hnuah Real Madrid-in harhna an chang leh tawh niin lang mah se Thawhlehni zan khan La Liga match-ah Espanyol 1-0 in an ngam lo a, Real hlim chhung a rei lo.
Catalan club Espanyol hi awlsam taka hnehna chang erawh an ni lo–goal khung tur hian injury time an nghah thlen a ngai a, Gerard Moreno-a'n Real barakhaihin kum 10 chhunga a vawi khat nan Espanyol-in Real Madrid an hneh.
Real Madrid tan Cristiano Ronaldo chu squad-ah pawh awm loin chawlh hahdamna hun pek a ni a, Zinedine Zidane-a naute tan hei hi chhuanlama hman chi erawh a ni lo–Gareth Bale, Isco leh Marco Asensio ten inkhel bul an ṭan tlat.
Striker Ramos
Real-in Bale, Isco leh Asensio an nei chungin Espanyol goal-ah an khung thei lo a, bench-a dah Karim Benzema-a'n a hmel a lan hnuah pawh French forward hian goal a keng tel bik lo–Spanish striker Moreno-a'n first half-a a goal khung pawmsak a nih loh avangin Real an vannei zawk.
Madrid khaw club-in goal khung an harsat miau a, point thum hlawh ngei an duh bawk si avangin hun tawp hnaih lamah chuan Real defender Sergio Ramos chu tlarhmaah 'extra' striker angin a tlan chhuak!
Spanish defender-in ṭum dang angin hun tawp hnaiha goal khung erawh a thiam bik lo–Moreno-a'n Espanyol chakna goal khungin Real tan chhanletna hun a awm tawh lo. Real boss Zidane chuan, "Hun tawp a hnaih a, 0-0 a nih chuan engpawh a thleng thei a ni," tiin Ramos a tlanchhuah tir chhan a sawi.
Chak phu lo Real
Zinedine Zidane-a'n a naute khelh dan a hmu chiang a, Real boss chuan chak an phu loh thu a sawi. French manager chuan, "Engtiklai pawhin hnehna chan ngei kan duh ṭhin a, vawiinah erawh kan hlawh chhuak thei lo. Inkhel tawp rual deuhthawin goal an rawn khung a, chhanglet turin hunin in min daih tawh lo. Tlawm kan phu lo a, hnehna chan pawh kan phu chuang lo," a ti.
Zidane chuan sawi zawmin, "Khawi hmunah pawh khan team hnuaihnung zawk kan ni a, kan chak loh avangin rilru a na a, result chhe tak a ni. Ka player-te ka tawrhpui a, a chang chuan hetiang result duhawm lo hi kan pawm a ngai a ni," tiin a sawi.
Real-in La Liga-ah pathumna dinhmun an la luah mek a, an dinhmun erawh la danglam thei a ni–nizan khan Valencia an inkhel a, an chak chuan Real tlanpelin pathumna an ni ang.
Mangṭha thawnthu hlui
Espanyol-in Real Madrid laka hnehna an chan chiah khan an club chanchina thawnthu duhawm lo tak chu thaichhiatin a awm tel nghal–Real nen an inhmachhawn hnuhnung 22-a chak hmel hmu miah lo team-in Madrid khaw club an hneh thei a ni tih an zir chhuak a, an record duhawm lo an thaibo bawk.
Catalan club hi Real nena an match hnuhnung 22-ah hian vawi 19 ngawt an tlawm a, vawi thum an inhnehtawkpui thei hram–Thawhlehni zana hnehna an chan khan a kum ang zawnga chhut chuan October 2007 hnuah a vawi khat nan an chak.
Hei mai a ni lo, Espanyol hian tun season-ah Spanish club lian pathum Barcelona, Atletico Madrid leh Real Madrid an mikhual vawi thumah tlawm hmel an hmu miah lo–1997/98 season hnua club lian pathum laka home record an neih ṭhat ber a ni a, Real an hneh tak avangin table laihawla season khar an beiseina a nung thar leh ta bawk.