Mapuia Cricket League Vawiinah khelh ṭan a ni dawn ta

Mizorama cricket inelna ngaihhlut ber Mapuia Cricket League chu vawiin hian khelh ṭan a ni dawn ta a, match pahnih awmah team ṭha pali an inlan nghal dawn avangin inkhel a hmuhnawm dawn.

Suaka Cricket Ground, Sihhmuia inelna neih turah match hmasa ber hi vawiin chawhma dar 9:00 hian Chanmarians leh Ramhlun Venglai an inhmachhawn dawn a, he inkhel hi a hmuhnawm dawn.

Champion lai Chanmarians-in an nomawi humhim turin an match hmasa ber aṭanga chak nghal a ṭul ang tih an hrechiang dawn a, amaherawhchu Ramhlun Venglai hi Malsawmdinpuia leh Lalchhuanliana te awmna a nih avangin a awlsam lo ang.

Inkhel hnuhnung zawkah chawhnu dar 12:30 hian Kulikawn leh Chhinga Veng an inhmachhawn dawn a, boruak a sang nghal ang. Kulikawn-in Chanmarians nen Mizoram cricket an thunun ṭhin a, mah se 1st division inelna Mahuma Memorial Cricket Tournament-ah Chhinga Veng hi an rawn champion avangin Kulikawn tan hna a awlsam lo ang.

Kulikawn tan captain Michael Lalremkima thiamna a la pangngai reng a, boruak sang kara a team chakpui turin theihna a nei sang tawk - hetihrual hian 3C hian Assam tana Ranji Trophy khel tawh Samik Das leh spinner Lalchhandama Sailo an neih hi an inchhuanpui ve tho.

MCL hi over 20-a khelh tur a ni dawn a, team zawng zawng an intum kual vek hnuah a sang paliin qualifier leh eliminator khelin final lut tur an zawng dawn a ni.