Republic VR4 an chak nawn

Mizoram Super League season lina relegation playoff-ah Republic VR4 chuan league round-a an hneh tawh Mission Vengthlang Hollow chu Thawhlehni zan khan 69-51 in an hneh nawn a, March 6 zanah playoff game 2 khelh a ni ang.

Hawla Indoor Stadium-ah chak tumin inkhel mah se a nung tawk lo a, first quarter-a team pahnih point belhkhawm chu point 18 lek a ni. Hollow lamin ARC player Lalhmachhuana leh Lalruatfela te an la chhawr theih loh avangin VR4 chu team ṭha zawk an ni a, chak turin harsatna an tawk loah a ngaih theih.

Republic VR4 tan Lalpekhlua chuan point 24 zet a nei a, ani hian point nei tam falin TC Lalnunmawia (10 pts), Lianhmingmawia (8), R. Darliansanga (7) leh C. Lalchhandama (7) te an ṭangkai a. Hnehna an chan chian avangin coach Liansangpuia'n player naupang zawk khelhna hun a siam sak thei bawk.

MSL relegation playoff hi best of three a khelh tur niin a chak lo zawk hi an relegate dawn a, a chak zawk pawhin Mizoram chhunga basketball inelna sang ber khel turin MSL Qualifier-a pahnihna nen playoff an khelh leh a ngai dawn a ni.