Barty ngaih a ngam chiah lo

Hmeichhe tennis world number 1 Ashleigh Barty chu coronavirus vangin a rilru a la thlamuang lo a, tun dinhmunah chuan eng tournament mah phur leh thlamuang taka khelh theih a beisei loh thu a sawi.

Australian nula hian season hmasa khan world ranking-ah a chung ber a luah a, tlahniam loin tun thlengin a dinhmun a la luah thei. Inelna a awm hma chuan ranking pawh siam thar a ni dawn lo.

Barty chuan, "Tennis a khelh theih leh dawn hnai tawh, hun rei tak chhung chanchin ṭha lam hriat tur a awm loh hnua hetiang thu hriat tur a awm ringawt pawh hi a hlimawm thawkhat hle.

"Mahse tun dinhmunah chuan ram hrang hrang hi an la inkharkhip deuh vek a, mikhual thlen an chak lo tlang hle. US Open khelh ngei ka duh a, chutihrualin tuneitu lam thu ngaichang chungin thutlukna ka siam ang," a ti.

Ram tam zawk chuan an rama zin lut reng reng chu ni 14 chhung an khunghrang hmasa zel, infiammite ngaihhnathiam an nih bik loh chuan tournament khelh pawh a buaithlak dawn hle. US ram chhunga inelna ṭhenkhat pawh US Open khelhna tur New York-ah sawn tumna a awm hial.

Barty chuan, "Tun dinhmunah chuan inkhel turin ka la inpeih lo, taksa leh rilru a inpeih chiah lo a ni. Keimah ang bawkin player dangte pawh an la inpeih ka ring bik lo, inelna nung leh nuam tak nei tur chuan hun thawl kan la mamawh," a ti.