Europe-ah Liverpool squad an hlu ber

Research group CIES Football Observatory-in an zirchianna thar berah Liverpool chu Europe-a squad nei hlu ber an ni a, Premier League hmahruaitu squad hlut zawng hi pound tluklehdingawn 1.27-ah chhutsak an ni. 

Manchester City chu pahnihna niin an squad hlut zawng hi pound tluklehdingawn 1.24 a ni a, Chelsea, Manchester United leh Tottenham Hotspur chu Premier League club zinga top 10-a lang an ni bawk. Liverpool squad hlut chhan langsar tak chu khelmuala an chet ṭhatna hi a ni - khelmualah result an neih miau avangin player-te hlutna a sang tel nghal a, chu chuan squad a ti hlu lehzual. 

Merseyside club hi Premier League-a champion thei dinhmunah an ding mek a, season hmasa khan European champion an ni bawk. Tun season-ah Champions League nomawi an humhim dawn lo tih chiang tawh mah se UEFA Super Cup leh Club World Cup-ah an champion a, player-te hlutna a san belh lo thei lo. 

Bundesliga club Paderborn chu squad hlu lo ber an ni a, an hlut zawng belhkhawm hi pound maktaduai 33.7 a ni. Spanish champion Barcelona chu pathumnaah an awm a, Real Madrid chu palina an ni thung. Mak tak maiin Chelsea chu panganaah an awm a, Paris St-Germain ai pawhin an squad hlutna a sang zawk - Blues squad hlut zawng hi pound maktaduai 917-ah chhutsak an ni. Chelsea hi transfer lama hrem an nih avangin an bazar thei lo a, mahse academy chhuak player tam zawkin hei hi hming chherna remchangah an hmang.

 

CIES chuan, "Player naupang hming rawn chher tharte hian an squad hlutna a belhchhah a ni," tiin rin loh taka London club lan chhan an sawi. CIES chuan player hlutna hi an kum zat, contract rei zawng, an hmasawn dan, khawvel huapa hriat an hlawh dan, an khelh dan, an man pun dan leh economic level aṭangin a chhut. Player mala hlutna nei sang ber chu Kylian Mbappe a ni a, Paris St-Germain forward hlut zawng hi pound maktaduai 227-ah chhutsak a ni.