Spurs tan goal ruk; Sawisel hlawh VAR

Tottenham Hotspur-in FA Cup quarterfinal thleng turin Rochdale 6-1 in an sawp a, video assistant referee (VAR) hmangin thutlukna pawimawh siam a ni leh a, fakna aiin sawisel tur a tam zawk.

Nilaini zan inkhelah Spurs tan Fernando Llorente chuan minute 12 chhungin hattrick a siam a, Son Heung-min-a'n goal hnih khungin substitute Kyle Walker-Peters-a'n injury time-ah goal rukna a khung. League One mawngphaha awm mek Rochdale lamin an siphurh hmasa ber hi Stephen Humphrys hmangin an sut a, first half-ah 1-1 niin second half-ah goal an khung ve tawh lo.

Wembley neitu Spurs
Wembley Stadium hi England national team khelmual a ni a, tun season-ah erawh Spurs-in home match khelh nan an hmang. Mauricio Pochettino hoten season ṭantirh lamah harsatna tawk mah se tunah erawh mipui puihna nen White Hart Lane an ngai tawh lo, an result-in engkim a sawifiah.

Spurs hian Europe club ṭha Real Madrid leh Borussia Dortmund te chu Wembley Stadium-ah hian 3-1 ve ve in an hneh tawh a, Manchester United leh Arsenal te pawh an hneh ve ve a, inelna hrang hrangah match ruk chhung an chak zawn tawh a, eng team tan pawh lenluh a châkawm lo ang.

League One table mawngphaha awm mek Rochdale tan chuan Harry Kane, Christian Eriksen leh Hugo Lloris te awm lo chung pawhin Wembley Stadium-ah hnehna hlado chham ngaihna a awm lo a, FA Cup an khelh zel a rem ve tawh lo.

Tottenham hian March 7 zanah Italian champion Juventus an mikhual dawn a, khualmualah 2-2 in an inhnehtawk a, Wembely-ah fiahna hautak zawk an hmachhawn dawn.

VAR a rintlak loh?
Referee-in thutlukna dik zawk a neih theih nan tunlai thiamna hmanga duan VAR chu FA Cup-ah hman a ni a, tun dinhmunah chuan fakna lam aiin sawiselna ri a ring zawk.

Spurs hian minute rukna lekah Erik Lamela hmangin goal an khung a, replay en let pawha sawiselna tur awm lo anga lang hi goal luh hmaa Harrison McGahey chunga Fernando Llorente chet dan vangin pawm a ni lo. Spurs forward Llorente hian McGahey a khawih fuh hlek nachungin VAR hmanga ennawn a nih hnuah pawm a ni lo.

Son Heung-min-a'n minute 23-naah sawisel boin goal a khung a, minute hnih hnuah Rochdale player Matt Done-a'n Kieran Trippier a tihtluk avangin assistant referee-in freekick a pe a, VAR hmanga ennawn a nih hnuah penalty pek a ni. Done-a hian penalty area chhung thlenga a la pawh zui avangin VAR thutlukna hi pawmpuitu an tam zawk ang.

South Korean forward Son-a rawn pen chhuakin keeper Josh Lillis bumin a pet goal a, VAR hmanga Spurs forward tlan dan ennawn a nih hnuah pawm sak a ni lo. Argentine manager Mauricio Pochettino-a'n mak a ti a, ani ai mah hian mipui lamin hriatthiam har an la ti zawk.

Inkhel result erawh VAR vangin a danglam phah lo a, half time thlengin 1-1 ni mah se second half-ah team ṭha zawk Spurs-in goal nga zet khungin 6-1 in hnehna an chang.

An sel e
Tottenham boss Mauricio Pochet­tino chuan, "Dan thar avangin thil tam tak sawi zui tur a awm a, inkhel pawh ngaihtuah a har a ni. Kan referee-te hi Europe-a ṭha ber ber an ni tih chu ka chiang a, amaherawhchu kan kalphung thar erawhin min pui dawn nge harsatna min siam zel dawn tih hriatthiam a har khawp mai," tiin VAR a ṭawmpui loh thu a sawi.

Argentine manager Poch-a chuan, "Football-a thil hlu tak chu thil thlengin kan thinlung a deh dân a ni. Tuna kan dan hmanin chumi nawmna chu a paih bo a, referee-te tana thutlukna siam a harsat sawt avangin ka khawngaih a, anni ai maha ka tawrhpui chu inkhel entu mipui te an ni," tiin a ngaihdan a sawi.

Rochdale manager Keith Hill pawhin, "VAR hi hriatthiam a har a ni. Referee tan pawh a buaithlak a, fourth official-in thil thlen dan min hrilhfiah mah se hei aia ṭha hian referee hian puihna a mamawh a ni. A thil thlen dan pawh hi tun aia chianga lanchhuahtir a ṭul a, mipui pawhin an hmuh ve a ngai a ni," tiin VAR-ah hmasawnna tur a la awm thu a sawi.