Chapchar kût lawm nan I League inkhel

Vawiin chawhnu dar 2:00 hian Aizawl FC chuan tun season-a an I League match hnuhnung ber RG Stadium-ah Gokulam Kerala nen an khel dawn. Mizo club tana inkhel pawimawh tak hi Mizote hun pui Chapchar kût nen a inrual chiah a, I League inkhel hmangin tualchhung football ngainatuten Mualpuiah tual an chai ang.

Mizo club coach Santosh Kashyap chuan, "Chapchar kût lawm nan Mizo mipui point thum kan hmuh sak ang che u," tiin thil pek atan hnehna chan sak a intiam a, Gokulam coach Bino George pawhin, "Kût niah kan khel dawn a, entu an tam dawn tih kan hria, chumi hmachhawn thei tur chuan kan inbuatsaih lawk a ni," tiin Mizo mipui vanga zam an tum loh thu a sawi.

Super Cup?
Aizawl FC tan champion nawn theih a ni tawh lo a, an tih theih sang ber chu Super Cup khel tura parukna nih a ni. Tun dinhmunah Mizo club hi paruknaah awm mek mah se anmahni aia match khata khel tlem Gokulam an hneh lo a nih chuan Indian Super League club leh I League club te inelna tura buatsaih Super Cup khel turin playoff an paltlang a ṭul dawn a ni.

Mizo club tan Super Cup khel turin hnehna chan a tawk a, an inhnehtawk a nih pawhin playoff pumpelh theih dan a awm. Aizawl FC hian match 17 an khelh aṭangin point 21 an hmu a, an chung chiaha awm Shillong Lajong nen an point hmuh zat inangin head to head-ah tluk lo mah se Shillong hian champion beiseina la nei East Bengal an la tum dawn a, point khat hi parukna china awm nan a tawk thei.

Chutiang bawkin Gokulam hian an match hnuhnung berah Mohun Bagan an la hmachhawn dawn. Kerala club hian an mualah Kolkata club hi mikhual dawn mah se Mariners laka point thum hmuh chu a awlsam lo ang.

Chak a ngai!
I League champion lai Aizawl FC-in champion nawn tumin season bul an ṭan a, ni thei ta lo mah se chak chunga season an khar hi a ṭul a ni. Result ṭha an neih loh hnuah pawh AFC phatsan duh lotu Red Army ṭhahnem tak an la awm a, heng fans runkawlte lawmna atan tal pawh Mizo club hi an chak a ṭul.

Aizawl FC coach Kashyap chuan, "Kan mual leh khualmual chu a dang. Indian Arrows nen khan Goa-ah 2-2 in kan inhnehtawk a, kan mualah chuan awlsam takin 3-0 in kan hneh thei. Minerva Punjab nen kan khelh ṭum khan Chandigarh thleng a thlawh thei lo a, chuvangin Delhi aṭangin bus-in kan kal a, kan khelh hma ni zing dar 4:00-ah kan thleng chauh a, kan chau a ni," tiin an chauh avangin khualmualah result ṭha an neih theih loh thu a sawi.

Mipui puihna nen an ṭhat thu sawiin Kashyap-a chuan, "RG Stadium-ah chuan ṭantu kan ngah dawn a, Indian Arrows nen pawh khan min ṭawiawm ṭha a. Gokulam nen pawh hian ṭha takin mipuiin min ṭawiawm leh se keinin point thum hmuh kan tum ang, " tiin chak a inbeisei thu a sawi.

Chanchin ṭha
Aizawl FC-in 'food poisoning' vanga match thum chhung an chhawr theih tawh loh Masih Saighani an chhawr thei tawh dawn a, Afghan defender awm tur hi chanchin ṭha a ni.

AFC boss Kashyap chuan, "Masih pawh a dam tawh a, training a zawm leh thei tawh. Minerva kan hmachhawn hnuah vawi hnih training ṭha takin kan nei leh thei tawh e," tiin hlim takin a sawi.

Mizo club hian Minerva lakah goal hnih an chhuah a, an tlarhnung a phui tawk lo. Hemi chungchang hi sawiin Kashyap-a chuan, "Kei chuan kan tlarhnung pawpna lai ka hmu lo a, kan tihsual vawi hnih Minerva lamin an rawn hmang ṭangkai mai a ni. Chu pawh chu kan chauh vanga thleng chauh a ni a, tunah chuan Masih kan nei leh tawh a, kan insiamṭha ang," a ti.

Gokulam an ṭha!
Gokulam-in an mualah Aizawl FC 2-0 in an hneh lo a, amaherawhchu hetihlai hi I League club thar chhiat lai a ni. Tunah erawh Gokulam hian an foreigner player-te thlakin team ṭha an ni a, match hnuhnung pasarih aṭangin point 16 ngawt an hlawh chhuak.

Hei chauh hi a ni lo, Kerala club hian match zawnin Mohun Bagan leh East Bengal te an hneh thei a, Aizawl FC-in ṭum hnih an hneh loh Shillong Lajong pawh 3-2 in an hneh a, champion rinkai Minerva Punjab pawh an mualah an hneh a, an record hi a chhuan tham a ni.

Gokulam coach Bino George chuan, "Season ṭantirh kha chuan tawnhriat kan la nei lo a, kan player zawng zawng hi mi thar an ni ber a, foreigner pawh kan nei ṭha tawk lo. Tunah chuan player pawh kan nei ṭha tawh a, kan team an inhrechiang tawh a, Aizawl FC hi team ṭha tak ni mah se kan hneh thei a ni," tiin an result ṭha an chhawm nun theih a inbeisei.

Kerala hian Uganda player Henry Kisekka leh Bahrain player Mahmood Al-Ajmi te an kawl a, Kashyap-a leh a hoten an mualah foreigner player ṭha hmaah fiahna an hmachhawn dawn.

Buaina Artificial Turf!
RG Stadium-ah artificial turf phah a ni a, Kerala lamah phaitual hnim an hman avangin khelh an harsat dawn. Bino George chuan, "Natural grass leh artificial turf chu a dang a, Aizawl FC khelmuala khelh a harsa dawn. Training-naa ka hmuh dan chuan artifical turf hi a hlui tawh a, kum 10 vela upa ni tawhin a lang a, ball inpek a dik mawh hle," tiin inkhelhna hmun tur chungchang a sawi.

Tun dinhmuna Aizawla khelmual ṭha ber RG Stadium hi Indian Arrows coach Luis Norton de Matos pawhin a sawisel tawh bawk. Mizo club-in I League khelh nan hmang thei mah se Asia club te tana inelna sang ber dawttu AFC Cup khelh nan RG Stadium hi a hman tlak loh a, hei vang hian coach tawnhriat nei ṭhate thusawi hi a pawmawm hle.

Champion thar?
Minerva Punjab chuan vawiin tlai 5:30 hian Chennai City an tlawh dawn a, Punjab club tan I League nomawi chawi turin inkhel pawimawh a ni.

Coimbatore-ah Minerva-in point thum an hlawh chhuak a nih chuan champion turin Khogen Singh leh a hote hian an match hnuhnung berah Churchill Brothers draw a tawk ang.

Chennai City hian an match hnuhnung berah East Bengal 1-7 zetin an hneh lo a, he inkhel aṭanga teh chuan Minerva tan harsa tur a awm lo. Amaherawhchu an mualah chuan V. Soundararajan hote hian Churchill Brothers 3-1 in an hneh thung a, awlsam takin Punjab club hi chak tir an tum lo ang.