Zaninah MSL Semifinals Game 1 March-a tel loin Vikings
Mizoram Super League season lina league round a hmuhnawm tawk lo a, semifinal chin erawh a entlak tawh dawn. Zanin dar 8:00 hian club inel pahnih Mission Veng Vikings leh Tuikual South te Hawla Indoor Stadium-ah an inkhel ang.
MSL hmasa lamah Mission Veng leh Tuikual South inkhel hi 'bye bye inkhel' tih hming pek a ni. MSL2-ah Tuikual South chuan semifinal-ah Mission Veng hnehin entu mipuiin Vikings ṭantute an 'bye bye' zui a, thawm a awm hat. MSL3-ah Mission Veng an inthuam ṭha a, semifinal-ah intawng lehin Vikings-in an 'bye bye' let ve thung.
Mipui lam hi
Tun ṭum hi semifinal-a an vawi thum inhmachhawnna tur chiah a ni a, Mission Veng leh Tuikual South mipui tan chuan an 'history' vang ringawt pawh hian inkhel enna tham a ni.
MSL ṭantirh aṭanga inlan tawh ve ve an nih avangin Mission Veng leh Tuikual South mipuiin an team-te au phur dan an thiam tawh a, an infuih phur ṭhat chuan veng pahnih hian chak pui tham ṭantu an nei ve ve an ni.
March-a tel loin
MSL4-a foreigner ziak awmchhun chu Mission Veng an ni a, anni hian nomawi an chawi theihna chhan Ronald March an ziaklut nawn a, amaherawhchu an manager H. Lalhruaitluanga chuan American player an la chhawr theih loh tur thu Vanglaini a hrilh.
Vikings manager Ahruaia chuan, "March hi game 1-ah a rawn tel dawn lo a, semifinal-ah hian a rawn inlan thei ang em tih hi kan chiang ngam tawh lo. Amaherawhchu, March-a tel lo pawhin team ṭha kan ni a, player-te an inhrechiang a, kan defensive game hi kan ṭhatna a ni a, hnehna kan chang thei a ni," tiin a sawi.
Mission Veng hian MSL4 match hmasa berah 64-59 in Tuikual South hi an hneh a, Mizo hlang ve vea inkhelah champion lai an chungnung zawk. Vikings tan Michael F. Lalawmpuia leh Moses Zoremmawia te an ṭangkai nghal a, an team thawh hona a ṭhat bawk avangin semifinal lut hmasa ber an ni.
TKS an phur
Tuikual South coach KC Lalliantluanga chuan, "March-a kan hmachhawn dan tur hi kan zir a, amaherawhchu a theihna kan hre vek a, a awm loh chu kan tan a ṭha zawk," tiin American player awm lo chu a lawm thu a sawi.
An inkhelh hmasak ṭum chungchang sawiin KC-a chuan, "Kan intawn hmasak ṭumah kha chuan kan dah hniam ve bawk a, kan chesual a ni. Vikings hi team ṭha tak an ni a, Mizoram aiawha national competition an khelh bawk avangin inrintawkna an ngah bawk. Keini pawh tunah chuan kan player tharten kan khelh dan an bel tawh a, season ṭantirh ai kha chuan kan ṭha zawk," tiin chak a inbeisei thu a sawi.
TKS tan an veng tlangval F. Zodinthara chu player pawimawh a la ni reng a, an intawn hmasak ṭuma che ṭha Lalnunpuia Renthlei (22 pts) pawh zanin hian Vikings tan an hnawksak ang.