Atletico leh Griezmann harhna - champion beiseina?

Antoine Griezmann-a'n Sevilla laka hattrick a siam hnu lawka a match hmasa berah goal li a khung lehnghal a, Atletico Madrid chu Leganes lakah 4-0 in hnehna a chanpui.

Griezmann-a'n a zawna hattrick a siam avangin kum 2000 hnu lama Atletico player La Liga-a a zawna hattrick siam thei hmasa ber dinhmun a luah nghal a, Atletico hi a zawna vawi riat hnehna an channa a ni chiah ta bawk.

Atletico Madrid-in hnehna an chan leh tak avangin La Liga champion chiang tura Barcelona dahsa tuten an ngaihtuahna an sen ṭhat leh a ṭul ang–Madrid khaw club hian Barca hi point li chauhin an phak tawh lo a, nizana inkhel Barca result a zirin an dinhmun erawh la danglam leh thei a ni.

Griezmann 'day'
Season ṭantirah Griezmann-a'n beisei a phak lo a, French forward-in sawisel a hlawh nasa. Mahse, a hunah tak Griezmann-a'n harhna a chang a, Diego Simeone-a'n, "Griezmann a khelh ṭhat chuan Atletico chu kan ṭha a ni mai," tia a sawi chu a takin a thlentir zel.

France international hian minute 26-naah Koke ball siamsak chu goal hmahruai ni turin a khung nghal a, freekick hmangin a pet goal chhunzawm bawk. Chawlhlawk hman a nih hnuah pawh Griezmann bawk a langsar a, goal hnih a khung chhunzawm.

Kum 26 mi forward hian tun season La Liga-ah goal 15 a khung tling leh ta der a, league-a goal khung hnem lamah Iago Aspas, Luis Suarez leh Lionel Messi te chiah a tluk lo tawh.

Costa vang maw?
Diego Costa-a'n nipui transfer laiin Atletico Madrid pan tawh mah se Spanish club hi kum tling lo player lakluh dan chungchangah hrem an nih avangin Spain international-in a tir aṭangin Madrid khaw club tan a hmel a lan thei lo a, January-a a inlan hnuah erawh Atletico-in hma an sawn a, Griezmann-a'n hma a sawn lehzual.

Atletico Madrid coach Diego Simeone chuan, "Costa kan neih tak avangin Griezmann hi a ṭha sawt a ni mai lo a, team pumpui hian nasa takin hma kan sawn. Hetianga hmasawn zel kan tum pawh hi a pawimawh takzet a ni," tiin a sawi a, Griezmann-a goal li khung zanah Costa ṭhatna a hmuh hmaih lo.

Argentine coach chuan, "Griezmann hian season dangah pawh tun anga ṭha hian a lo khel fo tawh ṭhin a, player ṭha chungchuang bik a ni a, hetiang taka khel ṭha tur hian a ṭhiante puihna a hmu ṭha ve bawk a ni. Goal khung tura Koke, Filipe Luis leh Costa hnen aṭanga a ball hmuh kha in thlir chuan a ṭhianten an thlawp ṭhat zia in hmu ang," a ti–Griezmann hian Costa-a'n Atletico tana a khelh leh hnuah goal 13 ngawt a khung tawh.

Champion beiseina
Atletico Madrid-in La Liga-ah champion beiseina thar an nei ve leh ta a, hmahruaitu Barcelona chu point li chauhin an phak lo tawh–Barca hian nizanah Las Palmas an hmachhawn a, he thuziak i chhiar meuh chuan an inthlauhna erawh a pungin a pung lo thei.

Madrid khaw club fans tana thu hriat nuam chu Atletico-in champion an beiseina kawngah Pathianni zan khian Nou Camp-ah Barcelona an la hmachhawn leh dawn a, Catalan club laka hnehna an chan chuan league nomawi inchuh boruak a nung thar khawp ang.

Atletico boss Simeone chuan, "Tunah chuan Barcelona hmachhawn tura kan inpuahchah a ṭul. He team hian tun thlengin league-ah tlawm hmel an la hmu lo a, anni hmachhawn hi kan tan chuan chona phurawm tak a ni dawn a ni," a ti.

Sevilla leh Europe
Atletico laka an mualpho hnu lawkah Sevilla an insiamṭha ve lehnghal bawk a, an mikhualna ramah 1-0 a Malaga hnehin season thar atan Europa League an khelh phak ngei a beiseiawm ta hle–hetihrual hian Champions League pawh thaibo ngawt theih a ni chuang lo.

Valencia-in pathumna dinhmun luah tura Real Madrid nekchhuahna remchang nei mah se khualmualah Athletic Bilbao chu 1-1 a inhnehtawkpui avangin palina dinhmun an luah chhunzawm zel.

Sevilla-in Joaquin Correa goal hmanga Malaga an hneh avangin Valencia hi point riat chiahin an thlau tawh a, March 10 zanah team pahnih hi an inhmachhawn dawn bawk avangin La Liga-ah champion bakah Champions League khelh phak inum boruak a sang tel.