Chak mah se PSG lawm a kim lo
Paris St-Germain chuan tun hnai ni li chhunga a vawi hnih nan Marseille an hneh. Nilaini zan khan PSG hian 3-0 a hnehna changin Coupe de France semifinal an inhlangkai.
PSG-in footballer manto ber Neymar chhawr thei lo mah se goal khung kawngah buaina an nei lo. Argentina international winger Angel Di Maria-a'n goal hnih a khung bakah Edinson Cavani chuan chak nemnghehna a khung bawk.
Amaherawhchu, PSG lawm a kim lo. Rawlthar duhawm Kylian Mbappe chu hliam vangin thlak a ngai. France international hi a ke rek na vangin half time-ah lakchhuah a ni a, a thlak turin Javier Pastore dah luh a ni thung.
Hliam a pawi
Arab sum hmanga siam len PSG hian Champions League nomawi chawi an duh a, European champion nih an duh miau avangin player lakluh nan pawh sum an ren lo hle. Pound maktaduai 200 zetin Barcelona aṭangin Neymar an lalut.
Spanish coach Unai Emery kaihhruaina hnuaiah UCL group stage an hmang ṭha viau, mah se last 16-ah erawh Real Madrid 3-1 in an ngam lo tawh, second leg khelh hmabak an la nei a, hliam vangin Neymar an chhawr thei dawn lo.
PSG president Nasser Al-Khelaifi chuan, "Neymar hi a rawn kir hun tur tak kan sawi thei lo, zai loh chu duhthlan tur dang kan nei lo a, amah leh club bakah Brazil national team nen inbiakna neih a nih hnuah a ṭha ber tura ngaihin hma kan la a, a rawn kir thuai kan duhin kan beisei," tiin a sawi.
Brazil captain hi tun kar hian an ramah zai a ni dawn a, chawlh kar riat vel tal a chawlh a ngai dawn. Neymar awm loh hnu lawka forward Mbappe inhliam zui ve leh hi Real Madrid mikhual tur Paris club tan luhaina tham a tling ang.
PSG manager Emery chuan, "Kylian Mbappe kha a ke rek a hliam a, chawlhlawk kan hman lai khan second half khelh tawh loh min dil a ni. A hliam hi nasa tak a nih loh hram kan beisei," tiin a sawi.