Chanmarians an chak nghal

Mizoram cricket inel­naa sum tamna ber Mapuia Cricket League chu nimin khan khelh ṭan a ni a, match hmasa berah champion lai Chanmarians chuan run kuain Ramhlun Venglai an hneh nghal.

Chanmarians tan ope­ner Lalhruaizela'n run 10 bak vaw chhuak thei lo mah se Lalhmangaiha (44 runs) leh captain K. Lal­remruata (59) te a hunah tak an 'rah' avangin over 20-ah wicket thum chiah hlohin run 140 an siam thei.

Ramhlun Venglai tan state pawn player Debakar-a'n run 47 rawn vaw chhuak ve mah se a ṭhian­ten an thlawp ṭhat tawk loh avangin over 20-ah RVL-in wicket ruk an hloh a, run kuain target an umpha lo.

Nimina inkhel pahnih­naah Mahuma Memorial champion Chhinga Veng CC-in champion zia an chhuah nghal a, MCL vawi hnih champion tawh Kulikawn CC chu wicket sarihin an sawp.

Kulikawn hian over 10.4-ah run 91 chiah siamin an out vek a, Samik Das an ngam lo - Assam tana Ranji Trophy lo khel tawh player hian over li a vawmah run 15 chiah pein wicket li a la a, run 48 a siam bawk.

Chhinga Veng hian over 16.2-ah lek an target hi umphain wicket thum chiah an hloh a ni.