Bayern-in champion an hnaih

Bayern Munich chuan Inrinni zan khan BayArena an luhchuah a, Bayer Leverkusen 4-2 in an hneh. Hansi Flick hote hian champion turin vawi hnih chak chiah an mamawh tawh a, Bavarians dal thei tur an awmin a lang lo.

Inrinni zan inkhel dangah Borussia Dortmund-in Hertha BSC 1-0 in an hneh a, nomawi lam ni loin Champions League khel turin an dinhmun an sawhnghet hnai. Chutihrualin Europe inelna sang ber hmunruak pahnih erawh club pathum RB Leipzig, Borussia Monchengladbach leh Bayer Leverkusen ten an inchuh chhunzawm zel ang.

Bayern Munich leh Bayer Leverkusen inkhel turah Kai Havertz hming a ri ring a, amaherawhchu Germany international hi tihrawl na vangin a inlan thei lo. Leverkusen tlarhmaah Lucas Alario, Karim Bellarabi leh Moussa Diaby te an awm a, bul pawh an ṭha.

Minute 9-na lekah Argentine striker Alario-a'n offiside trap a bum a, Julian Baumgartlinger through ball um lutin goal hmahruai a khung. Leverkusen-in an intawn hmasa zawkah hnehna an chang a, an match hnuhnung 14-ah vawi khat chauh an chak loh bawk avangin an phur hman hle.

Germany-ah Bayern Munich an lian fal a, an elpui ber player duh lai pawh an lak theih miau avangin ven tur bik an awm lo. Goal khung tam ber Robert Lewandowski ringawt ven theih a ni lo a, player tin chu player naran chunglam vek a ni. 

Minute 27-naah Kingsley Coman-a'n siphurh a sut a, France international siamsaktu Leon Goretzka-a'n minute 42-naah goal hmahruai a khung leh bawk. Halftime hma chiahin Serge Gnabry-a'n a khung belh a, Bayern Munich-in ngaih ṭha takin dressing room an pan.

Second half-ah Lewandowski-a'n ṭha zetin a tauh lut a, minute 66-naah 4-1 a ni. Scoreline tih mawi nan Florian Wirtz-a'n minute 89-naah Bayer Leverkusen tan a khung a, Manuel Neuer dem theih a ni lo.

Bayern Munich manager Hansi Flick chuan, "Football-ah chuan chak a pawimawh. Kan inkhelh ṭantirh khan chesual deuh mah ila kan insiamṭha hma a, huaisen takin kan tho chhuak. Ka player-te rilru put hmang ka lawm a, kan chak avangin ka lawm bawk," tiin a sawi.

Tun hnaia hmasawn tak Leon Goretzka chuan, "Team ṭha lakah chuan thawhchhuah hi a har ṭhin a, chutah tak chuan kan rilru put hmang kan pholang. Kan khel ṭha a, hun tawp lamah phei chuan inkhel kan thunun hneh hle," tiin a sawi.