Corona vanga chawlhna - thil ṭha tihna hun atan

Khawvelin coronavirus a buaipui a, a nghawng nat ber zinga mi chu infiamna khawvel a ni - sum tam tak senga huaihawt inelna an chawl ṭhuap a, infiammite pawhin in lama inkhung mai loh chu tih tur an nei meuh lo. 

Kartawpa an infiamna ngainat ena in awm tlei ṭhinte tan pawh kalna tur a awm lo a, in lama awm pawhin an tana ennawm nuam ber chu en tur a awm lo - khawvel a reh a ni. 

Chutiang harsatna karah chuan infiamna khawvelin a 'mawina' a pho chhuak a, infiammi leh club ṭhenkhat ten he chawlh hun hi holam taka khawhral mai loin mi dangte ṭanpuina hun atan 

an hmang. Ṭhenkhatin he 'chawlh' avanga hlawh lak tur nei lote tan chawlh chhunga an hlawh tur tumsak an tiam a, a ṭhenin ei tur nei lote tan sum leh pai an thawh bawk - hun harsaah midangte tan lawmna an thlen a, ngui taka awmte chu an nuih tir. 

Watford chuan Thawhṭanni khan thuchhuah siamin an club ṭantute chu midang ṭanpui tura inpe turin an sawm a, hetianga inpe thei te tana hming thehluhna tur nen lam an tarlang - kum upa zawkte titi pui turte, bazara chakkhai lam sakte ti turin fan-te an ngen. 

Aston Villa, Brighton leh Fulham-te chuan an inkhelh hun tur sawn a nih tak avangin inkhelh hun atana hnathawkte ei tur an 'order' sa chu chenna in nei lote puitu pawlah an pe. Liverpool chuan an club innghahna khawpuia ei tur nei lote pui tura Liverpool leh Everton fan-ten an din Fans Supporting Foodbanks-ah £40,000 an thawh a, Everton chuan North Liverpool Foodbank-ah ei tur kg 635 lai an thawh bawk. 

Steph Curry a lo lang e 

Golden State Warriors innghahna Stephen Curry leh a nupui Ayesha-te chuan Oakland  khawpuia naupang ei tur nei lote tan midang ṭanpui tura pawl an din Eat Learn Play hmanga sum an thawh tur thu an sawi. 

Oakland-ah hian covid-19 vangin school zawng zawng khar a ni a, Curry-a sawi dan chuan school naupang 18,000 chuang chu school-a an ei tur dawn ṭhinah an innghat. School chawlh lai pawha heng naupangte hian ei tur an neih theih nan Curry chuan hma a la a, heng naupangte tana pen chhuak turin mipuite a sawm bawk. 

NBA lam pawh covid-19 in a zuan kan chuang lo - match khelh hun sawn hlat vek a nih takah chuan stadium-a hnathawk ṭhin engemaw zatin harsatna an tawk a, pui tura lo pen chhuak chu basketballer ho an ni. 

Milwaukee Bucks tana khel Giannis Antetokounmpo chuan home game an khelhna Fiserv Forum-a hnathawkte tan $100,000 a pek thu a puang a, New Orleans Pelicans rawlthar duhawm Zion Williamson chuan Smoothie King Center-a hnathawkte hlawh chu ni 30 chhung atan a tumsak tur thu a sawi ve bawk.

Cleveland Cavaliers tana khel Kevin Love chuan arena-a hnathawk staff-te tan $100,000 a thawh tur thu a sawi a, Brooklyn Nets chuan an khelhna stadium  Barclays Center nen thuchhuah siamin stadium-a hnathawkte hlawh an pek tur thu an sawi. Hriat tel tur chu heng stadium-a hnathawk tam zawkte hi darkar bi a hlawh la an ni a, hna an thawh loh chuan hlawh an la lo - NBA match a awm ta si lo a, innghah nan bera hmang tam tak an awm avangin hnathawk lo mah se hlawh an lak theih nan basketballer ho an pen chhuak ta a ni. 

National Football League player JJ Watt leh a nupui, Chicago Red Stars midfielder Kealia Ohai Watt te chuan Houston Food Bank-ah $350,000 sum an thawh a, mi maktaduai khat bawr tan ei tur an pe dawn tihna a ni. 

Watt-a hian JJ Watt Foundation kaltlangin kum 2017-a Hurricane Harvey-in USA a nuai khan dollar maktaduai 41 vel zet a lo khawn ngah tawh a, midangte ṭanpui kawngah a lo thawh hlawk tawh ṭhin hle. 

English cricketer Sam Billings-a'n awm mai mai a tum bik lo - a chenna Canterbury chhehvela chhuak ngam lo, chakkhai lamsak ngaite chu social media lama amah be turin a ti. 

Billings hian heng mite hi 'bazar' sak a inhuam a, pawn chhuak thei lote chu puih a tum a ni.