Aizawl FC-in Super Cup an khel dawn

I League champion lai Aizawl FC chuan nimin tlai khan league match hnuhnung berah Gokulam Kerala chu 3-1 in an hneh a, Super Cup khel turin an tling.

RG Stadium, Mualpuia inkhelah hian Gokulam-in Mahmood Merza Alajmi penalty hmangin minute 25-naah hma hruai mah se Aizawl FC-in second half-ah Leonce Dodoz-a goal hnih leh Lalkhawpuimawia te goal hmangin an lehthal.

Kerala an chungnung
Gokulam lamin first half an thunun a, Mohammad Rashid chuan Avilash Paul aia thlan keeper Lalawmpuia a fiah a, Mizo keeper-in fiahna hmasa paltlang mah se minute 25-naa Mahmood Merza Alajmi penalty erawh a dang thei lo.

Ugandan striker Henry Kisekka chu AFC tlarhnung tan a hnawk sak a, Gokulam-in penalty an hlawhna chhan pawh Kisekka ball petin Lalchhawnkima kut a per vang a ni.

Keeper AwP-a a che ṭha zui a, winger Salman ball pet ṭha takin a dang. AFC an vannei a, hun tawp hma hretin Kisekka-a'n goal h nih khung theihna tur hun ṭha a hlah.

Second half-ah AFC
Gokulam tana penalty khungtu Mahmood Merza Alajmi beiseina chu first half-a Mapuia penalty pe lotu referee Crystal John-a'n a tihhlawhtlin sak lo.

Aizawl FC an che ṭha zui a, Gokulam defender Daniel Addo chu inhliam vanga minute 51-naa an lakchhuah hnuah an goal nawr a na lehzual.

Andrei-a ball pass ṭha Albert Zohmingmawia'n goal-ah a chantir thei lo a, minute 60-naah an nawr nat rah an seng. Dodoz-a'n buai nuaih karah a pet goal a, Ivorian forward hian minute 74-naah keeper Bilal Husain-a'n angle a khar ṭha lo chu hmu fuhin goal hnihna a khung.

Kelkang tlangval Mapuia'n minute 79-naah Gokulam keeper ball hnekchhuah na tawk lo chu kawh zetin a pet goal a, Aizawl FC-in goal thum an khung a, mikhual team-in an khung belh thei lo.

AFC tana goal khungtu Dodoz leh Mapuia hian Portuguese coach Paulo Meneses hnuaiah an pet goal lo a, coach thar Kashyap-a hnuaiah Ivorian forward-in match ngaah goal li a khung a, Mizo tlangval hian RG Stadium-a match hnih a khelhah goal thum a khung ve bawk.

5-na emaw 6-na
Aizawl FC leh Indian Arrows ten tun season I League match hnuhnung ber an khel tawh a, club dang tan erawh khelh tur a la awm.

Mizo club hian point 21 hmuin panganaah an awm a, Shillong Lajong aiin point thumin an hmu tam zawk. Amaherawhchu Lajong hian March 5 tlaia East Bengal an hneh chuan AFC hi head to head-a an ṭhat zawk avangin Mizo club hi paruknaah an awm thung ang.

Gokulam erawhin March 6-ah Mohun Bagan an la hmachhawn dawn a, hnehna an chan chuan Lajong leh East Bengal inkhel result a zirin paruknaah an la awm thei ang.

Eng nge an sawi?
Aizawl FC coach Santosh Kashyap chuan, "Chapchar Kut lawm nan Mizo mipuite kan chak sak thei hi kan lawm hle a ni. Chak lo ta i la chuan kut nuam tak an hmang thei dawn lo a, Super Cup khel pha turin chak kan mamawh bawk a, result ṭha nei turin halftime-ah kan infuih ṭha a, kan duh ang result kan nei hi kan lawm a ni," tiin Mizo mipuite tan an chakna a hlan thu a sawi.

AFC boss Santosh chuan sawi chhunzawmin, "Kan zin nasa a, kan inkhel nasa a, player-te an chauh tawh avangin player thlak kual a ngai a ni. Avilash pawh a chau tawh a, Minerva nen tihsual a neih phah a, chuvangin AwP-a ka rin ngam a ṭul. Chutiang bawkin David-a pawh player ṭha tak ni mah se hahdamtir a ngai a ni," tiin hahdam an mamawh thu a sawi.

Gokulam Kerala coach Bino George chuan, "Kan inkhel danglamna chhan chu Daniel Addo inhliam kha a ni a, a awm loh hnuah kha chuan kan tlarhnung a pawp a ni. Ka player-te khelh danah ka lawm a, Super Cup hi league round zawhah emaw playoff kaltlangin khelh ngei kan tum a ni," tiin Vanglaini a hrilh.