Bazar ṭhulh lo tur Liverpool

Premier League club Liverpool chuan kum 2016-ah pound maktaduai 21 hloh mah se tun season-ah erawh pound maktaduai 39-a an hlawk thu an puang a, squad chhah ṭha tak nei tura chet lak zel an tum bawk.

Liverpool-in kum khat chhunga sum an lakluh hi a hma kuma pound maktaduai 62 aṭangin 364-ah a pung chho a, heti zat sum an lakluh theih chhan hi media revenue aṭanga an hmuh pound maktaduai 30 ni ṭhin 154-a a san tak vang te, commercial revenue pound maktaduai 20 chu 136-a a pun vang te a ni - hei bakah hian Anfield tih zauh a nih avanga ticket hralhchhuah hnem chu telh a ni.

Reds chief operating officer Andy Hughes chuan, "Kan stadium pawh tun aia ṭha leh changtlung zawk ni turin theihtawp kan chhuah zel ang a, khelmual chhunga kan chet dan chu kan ngaih pawimawh ber a nih avangin squad tichhah tur pawhin kan bazar zel ang," a ti a, sum ren an tum lo.

Liverpool hian zanin dar 11:00-ah Premier League match khel turin Newcastle United an lenchilh ang.