MSL-in mipui a hui khawm leh ta : Zarkawt-in Mapuia telna Khatla an hneh
Mizoram Super League season lina semifinal game 1 chu Ningani zan khan Hawla Indoor Stadium-ah khelh a ni a, Zarkawt BCA-in vawi hnih champion tawh Khatla TBL chu 73-67 in an hneh.
Game 2 hi March 8, Ninganiah khelh a ni dawn. Zarkawt hian final thleng turin vawi khat chak bak mamawh tawh lo mah se Khatla TBL coach leh player ni kawp H. Laldinsanga a rawn kir leh tawh avangin ngaih ṭha takin an awm lo ang.
A dang tawh
MSL4-ah Zarkawt BCA-in Khatla TBL an hmachhawn nghal a, 87-80 in an hneh. Hetihlai hian TBL-in India national team assistant coach Mapuia an nei lo a, tunah erawh Saron Veng tlangval hian Khatla kawr hain a rawn inlan leh tawh.
First quarter minute 1:52 a la awmin Mapuia a rawn lut a, Khatla an ṭha sawt a, TBL player-te an huaisen phah a, amaherawhchu league round-a chak vek BCA hneh tur chuan la insiamṭha tawk lo. Chutihrualin Zarkawt hian second 2.6 a awm chiahin an chak tih an nemnghet thei a, an inthlauhna a tam ta lo hle.
Lungawi lohna
Third quarter-ah Mapuia'n chuan cool takin ball a la a, inrintawkna nen mipuiin shot clock mila '5, 4, 3, 2, 1' an chhiar rualin basket a nei a, referee-in an pawmsak. TBL-in 52-47 in hma an hruai chiah a, amaherawhchu match commisioner ten Mapuia hian ball a thlah hmain buzzer a ri hman tih an hre chiang a, 'FIBA - Rules of the Game Art 44' ṭan chhanin referee tihsual an siam ṭah a, MSL1 MVP point hnih neih chu pawm sak a ni.
Inkhelh banah pawh hei hi TBL lam lungawi lohna a ni a, dan ang thlapin an khinglet a, amaherawhchu pawm sak an ni lo. TBL hian an ṭha zawk tih fiah an duh chuan game 2-ah an lantir a ṭul dawn a, India assistant coach Mapuia (16 pts) hoin Vanlalṭhazuala (15), Vanchuangpuia (10), Eddie Zaithanmawia (8), Vanlamuana (7) leh Gospel Lalthawmmawia (5) ten training khirh zawk an hmachhawn ang a, game 2 en a châkawm ta hle.
BCA an ṭha
Zarkawt BCA-in team ṭha ber an ni tih an lantir zel a, court chhungah Lalrina Renthlei (19 pts), Zonunsanga (7), Dennis Lalmuanpuia (16), Henry Lalramngaihawma (9) leh Matthew Sailo (8) te an luh rual chuan Khatla TBL tan dan an harsa tih hmuh hmaih theih a ni lo.
BCA tan Lalsangkima leh palian R. Lalfakawma te anṭangkai bawk a, game 1-a ṭangkai ber erawh Dede-a a ni. Dawrpui Vengthar tlangval hian hun harsaa point a neih bak a, tlarhnungah a ṭangkai bawk.
Zonuna ball fing tak tak chu hmuh a nuam a, Henry-a game tlo ṭha tak te chu BCA chakna hnar a ni.
Magic moment
Dede leh Lalrina ten mipui hmuh theih turin alley-oop an pholang a, amaherawhchu hemi hnu hian 64-63 niin TBL an phur chho hle.
Hetah tak hian Dede-a chak takin ball la chhuakin Henry leh Rina te nen rang taka inpe kualin passing mawi tak hmangin point an nei a, 66-63 ni chiahin chak an duh tih a pholang.
BCA hian freethrow lut se chak awlsam thei tur an ni a, amaherawhchu an hun ṭha neih an hlah hnem avangin second 2.6 a awmin Lalrina freethrow hmangin hnehna an chang.
Boruak nuam
Inkhelh hmuhnawm beiseiin Hawla Indoor Stadium khat mawi tawk an pungkhawm a, TBL leh BCA ten basketball hmangaihtute chu an hmuh châk inkhel hmuhnawm an chhawp sak.
Fans au dan hmang leh thawmhnaw hak kawngah season dang pha turin ṭan lakna tur awm mah se MPL6 bikah chuan inkhel boruak nun ṭhat ber zan a ni. Game 2-ah chuan supporter-ten an player-te phurna pe turin kawr inang an rawn ha chho ang a, boruak a ṭang ṭha lehzual ang.