Mizoram aiawh tur an puang ta

Nimin khan Mizoram Football Association chuan Santosh Trophy vawi 72-naa Mizoram aiawh tur an puang. Inelna hi Kolkata, West Bengal-ah March 19 leh April 1 chhungin neih a ni ang.

Mizoram hian kumin January 8-13 chhung khan Lammualah qualifier khel­in NorthEast aiawh turin Manipur nen an tling a, final round atan hian player pakua zet an thlak. Coach Lalsangzuala Hmar chuan, "Thlan theih zinga ṭha ber kan thlang chhuak a ni," tiin Vanglaini a hrilh.

MS-a tel loin
Tun season khelh zawh takah Chhinga Veng chuan nomawi chawi theih zawng zawng an chawi a, R. Malsawmtluanga chu MFA Super Cup-ah best midfielder, I Day Football-ah best player leh MPL6-ah best player leh best midfielder-ah te thlan a ni.

Darlawn tlangval MS-a hian qualifier-ah captain armband hrengin Arunachal Pradesh leh Assam an hneh ṭumin goal a khung ve ve a, amaherawhchu Police training a zawm avangin final round-ah a tel ve thei dawn lo.

Tel lo dang
Hriangtlang tlangval Vanlalbiaa Chhangte chuan I League champion thei zinga mi Minerva Punjab a zawm a, MPL6 best keeper F. Lalmuanawma chuan Police training a zawm bawk.

Goalkeeper dang Zo­than­mawia, defender pa­hnih C. Ramdinmawia leh Lalhlimpuia, midfielder Jacob Lalrawngbawla leh Lalrinchhana te bakah forward Lalrammuanpuia te inhliam leh chhan dang vangin koh tel an ni tawh lo.

Tuten nge belh?
Mizoram tana chanchin lawmawm chu Mizoram Police player-te chhawr theihin an awm a, tawnhriat nei ṭha player-te'n an belh.

Police goal nawr kawnga pawimawh F. Lal­rin­puia leh Lalbiakhlua te bakah heng player chawmtu V. Lalṭanpuia-te koh an ni a, 2014-a Santosh Trophy champion team-a tel vek an ni.

Tlungvel tlangval Ṭ-a hi 2004 champion ṭuma vice captain a ni a, Republic Veng tlangval Valpuia hi final-a goal khungtu a n. Anni bakah hian Police aṭangin Lalram­tharmawia leh goalkeeper Andrew Lalhmingliana leh Lalṭan­puia Ralte te koh tel a ni bawk.

Tlar hmaah MPL top scorer leh best forward ni tawh MS Dawngliana a awm belh a; midfield-ah Bawngkawn tlangval Lalnuntluanga leh tlarhnung Champhai tlangval Lalmuanawma te chu koh thar an ni.

Player an pawimawh
Mizoram coach Sanga chuan, "Club ang a ni tawh lo. Mizo­ram team chu an hlawh lakna a ni lo a, an inpekna a pawimawh. Kan thlen san leh san loh pawh hi player-te kutah thui tak a awm a, an theihna zawng zawng an chhuah phawt chuan thui tak thleng turin theihna kan nei a ni," a ti.

Mizoram hi Group B-ah Goa, Karnataka, Odisha leh Punjab te an awm a, an match hmasa ber chu Goa nen March 20 hian an khel ang.

Kum 2014 hnuah Mizo­ramin Santosh Trophy-ah nomawi an la chawi leh lo a, final round erawh an thleng ziah thung. Kum 2015 leh 2017-ah semifinal an thleng a, kum 2016-ah erawh final round group stage an paltlang lo.