Record nen Bengaluru an ropui

Bengaluru FC-in Indian Super League-a an season hmasa berah record siam chungin league round an khar–Ningani zan khan an match hnuhnung berah Kerala Blasters chu 2-0 in an hneh a, point 40 hmu chunga league round khar thei hmasa ber an ni.

Hetihrual hian tun season ISL-ah team thar pahnih an awm avangin match khelh zat 14 ni ṭhin chu 18-ah a pung chho a, hei hian point 40 hmua record siam kawngah Bengaluru a pui hle. South Indian derby-ah Bangalore club-in goal khung turin injury time an nghah thlen a ngai a, Miku leh Udanta Singh ten hun pek belhah goal khat ve ve an khung.

Bengaluru lamah Lalthuammawia Ralte, Malsawmzuala leh Zohmingliana Ralte ten bench lamah hun an hmang tluan a, Kerala tan Lalruatthara'n inkhel bul a ṭan thung.

ISL-ah Bengaluru, Pune City leh Chennaiyin FC ten playoff an khel dawn tih a chiang tawh a, hmun ruak pakhat a la awm–Pathianni tlai dar 5:30-ah Jamshedpur FC leh FC Goa an inkhel dawn a, team pakhat zawkin semifinal an khel dawn.

FC Goa tan a sang pali zinga tel turin khualmualah draw result hlawh chhuah a tawk a, Jerry Mawihmingthanga'n hmun pawimawh a channa hmun JFC tan semifinal khel tur chuan hnehna chan ngei ngei a ngai dawn thung–inkhel a hmuhnawm ang.