Barcelona an chelh; champion tur a chiang lo

Ningani zan La Liga inkhelah Barcelona an chak zo lo a, an mikhualna ramah Las Palmas nen 1-1 a an inhnehtawk avangin point khatah an lungawi a ṭul.

League hmahruaitu Catalan club-in hnehna an chan zawh loh avangin La Liga inum boruak a nung sawt a, pahnihna Atletico Madrid-in Lionel Messi leh a ṭhiante an phak lohna chu point nga chauh a ni tawh.

Pathianni zan dar 8:45-ah Barcelona-in Atletico Madrid an mikhual dawn a, Ernesto Valvderde naute champion chiang saa dah an harsa tawh–Atletico-in hnehna an chang thei a nih chuan point hnih chauhin Barca an sang tawh dawn tihna a ni.

Penalty
Barcelona-in inkhel ṭan aṭanga minute 21-na lekah Lionel Messi freekick ṭha 'mi' hmangin hmahruaina goal an khung a, La Liga-a 18-na dinhmun luah mektu Las Palmas-in si phurh sut turin rei an nghah erawh a ngai lo.

Second half ṭan aṭanga minute thumna lekah penalty an hlawh chhuak a, West Ham striker hlui Jonathan Calleri-a'n chiang zetin a chhuih lut. Barca tan sawisel tur a awm a, chu chu referee-in penalty a pek dan a chiang lo kha a ni.

Matias Aguirregaray laka Sergi Roberto foul avangin referee-in penalty hi a peah ngaih a ni a, ball-in Lucas Digne kut a per bawk. Barca coach Valverde chuan, "Engvangin nge penalty kan chawi tih kha a chiang lo a, hriatthiam theih loh penalty hmangin an rawn sut a ni ber," a ti!

A hming chu Messi
Barcelona-in hnehna chang zo lo mah se Lionel Messi ropuina erawh belhchhahin a awm zel–Las Palmas lama goal a khung chiah khan Argentine forward hian Spanis La Liga bikah khelmual 36-a goal a khungna chiah a ni.

Argentina captain hian Barcelona tan inelna hrang hranga goal 538 a khungna chiah a ni bawk a, Argentina tana goal 61 a khung belhkhawm nen a career-ah goal 599 a khungna chiah a ni–kum 30 mi forward ropuina belhchhahin a awm zel.

Messi hian tun season La Liga-ah match 26 khelin goal 23 a khung tawh a, top scorer a ni mek–inelna hrang hrangah match 40 khelin goal 31 a khung tawh a, goal khung a chawlhsan mai lo tawp ang.

Hmabak hautak
Barcelona-in Las Palmas laka hnehna an chan zawh loh miau avangin an champion kalkawng a harsa sawt a, 2018 chuan kai hmaa champion chiang saa Barcelona dahtu te pawhin an ngaihtuahna an sen ṭhat a ṭul leh ta.

Catalan club hian La Liga match 26 an khelh tawhah tlawm hmel la hmu lo mah se match rukah an khingpui an inhnehtawkpui a, heng zinga match thum hi an match hnuhnung panga aṭangin a nih avangin league match-a vawi ruk chak zawn tawh Atletico-in an hnaih sawt.

Atletico boss Dieo Simeone-a'n league match hnuhnung bera Leganes an sawp hnu lawkah, "Barcelona hian tun thlengin league-ah tlawm hmel an la hmu lo a, anni hmachhawn hi kan tan chuan chona phurawm tak a ni," tiin Catalan club an huphurh loh thu a sawi a, Barca fans tan thu hriat nuam a ni lo ang.

Atletico an ṭha
Madrid khaw club tan tun tluka Barca hnaihchilhna remchang a tam tawh lo ang–Nou Camp-ah hnehna an chang a nih chuan match 11 khelh tur la awm chungin Catalan club hi point hnih chauhin an phak lo dawn tihna a ni a, chumi ti thei tur chuan theihna an nei bawk.

Diego Simeone-a'n Chelsea striker hlui Diego Costa inlan theih hnuah an team-in hma an sawn thu a sawi a, Argentine manager thusawi dinpui turin statistics en turin a awm–Spain international kir hnuah match 15 khelin vawi hnih chiah an tlawm. Season ṭantira beisei phak lo Antoine Griezmann-a'n Costa awm hnuah goal 13 a khung tawh a, a match hnuhnung pahnihah goal sarih a khung!

Season hmasaa Chelsea tana goal 22 khungtu Costa hian match kua a khelhah goal nga a khung tawh bawk a, anni pahnih hi Barcelona beiseina thaibo turin an ṭha tawk. Hriat tel atana ṭha erawh Barca tan Messi leh Luis Suarez an la thiam reng tih hi a ni.