Gunners sawptu Man City hmabak Blues

Premier League hmahruaitu Manchester City-in nomawi chawi turin match nga chak bak an mamawh tawh lo.Pep Guardiola naute hian tun hnai ni nga chhung lekin Arsenal 3-0 in vawi hnih an sawp thei a, point 16 zetin an sang fal ta.

Man City hian Pathianni zan dar 9:30-ah champion lai Chelsea an mikhual zui leh dawn. Tun season league match bika Etihad Stadium-a point hnih chiah la hloh City hmachhawn hi Antonio Conte naute tan thil chakawm tak a ni hran lo ang.

City manager Pep Guardiola chuan, "Kan hnaih tawh, kan kuta awm a nih tawh avangin kan thlauh tur a ni lo. Champion turin hun pawimawh lai kan tawng mek a, a tawp thlengin kan ṭang tlang tur a ni ang," tiin Arsenal an sawp hnuah a sawi a, Blues lakah hnehna chan zui a tum hle.

Pep-a match 100
Spanish manager Guardiola-a'n Arsenal hneh chungin City a enkawl hnua a nomawi hmasa ber atan Carabao Cup a chawi a, inrintawkna sang tak nen Ningani zan khan Emirates Stadium-ah an lenglut zui nghal.

Wembley Stadium-a Gunners tlarhnung chhaih mangangtu Leroy Sane-a'n Hector Bellerin leh Shkodran Mustafi a paltlang hnuah Bernardo Silva tan a siamsak a, Monaco midfielder hlui hian a ke vei lamin mawi zetin a chhuih kual lut.

Arsenal tlanghnung an nghing zui a, Sane, Sergio Aguero leh David Silva ten ball an inpek kual hnuah Spain international Silva-a'n Petr Cech dan hman lohin a chhuih lut a, Arsene Wenger-a naute insiamrem hmain Sane chuan an goal thumna a khung zui bawk.

Mualneitu Gunners hian second half-ah an si phurh sut ṭhen theihna hun nei mah se an hlawhtling lo, striker manto ber Pierre-Emerick Aubameyang-a penalty chhuih chu City keeper Ederson-a'n a dan sak.

Pep Guardiola-a'n Man City a enkawl aṭanga match 100-naah nuamsa takin hnehna a chanpui a, City hian tun season league match 28 khelh aṭanga point 75 hmuin season hmasa pumpuia Arsenal point hmuh nen a inzat der tawh!

Hmabak Blues
"Kan rilru puthmang a dikin a fuh a, goal hmaah kan hriamin tih­sual kan nei tlem. Team ṭha tak lakah goal ropui vawi thum kan khung thei a, Premier League season nuam danglam tak kan hmang mek a ni," tiin Pep Guardiola a ṭawng chhuak tawh a, Chelsea lakah Arsenal hmaa an chet angin an che thei dawn em tih chu chhanin a awm thuai dawn.

Nikum Septem­ber thla tawp khan City hian Stamford Bridge-ah Chelsea hi si khat faiin an va luhchhuah tawh a, tun ṭuma hian an huphurh thar thut lo ang. City hian an khelmuala point hmuh theih 42 aṭangin 40 an hmu a, heng inkhelah hian goal 50 an khung - Conte tan tlarhnung remphui a ngai dawn.

Champion lai Chelsea hi tun dinhmunah pangana an ni mek a, an chunga awm Tottenham aiin point hnihin an hniam zawk. Blues hian an match hnuhnung berah Manchester United an hneh lo, City lakah an chak lo nawn a nih chuan Champions League kalkawng a harsa tawh ang.

Man City player ṭhat rual zia kan hria, chutihrualin Blues hian City tukdawl thei tur player an kawl ve tho. Belgium mid­fielder Eden Hazard leh Brazil international Willian te khelh ṭhat lai a ni. Amaherawhchu, khual­muala hnehna an chan theihna tur chuan tlarhma lama rinrawl Alvaro Morata-a'n pound maktaduai 60 man a nihna phu tawka a khelh chhuah a ngai tawh hle.