Chelsea ropuinain Arsenal a hliah khuh

Romelu Lukaku-a'n a sawi lawk ang ngeiin 'striker ṭha zawk' a nihzia a lantir. Belgium international hian Chelsea tana a goal hmasa ber khungin a club hi Arsenal lakah 2-0 in hnehna an chanpui - bul ṭanna duhawm bik a ni ngei ang.

Hripui len hnua a vawi khat nan Emirates Stadium khatin fans an pungkhawm a, an match hmasa lamah chak lo mah se Gunners ṭantuten beisei an la nei. Mahse, inkhel a zawh hmain fans tam tak an haw, tunah chuan tunge dem tur ber tih an zawng tawhin a rinawm.

Thomas Tuchel-a'n Lukaku man atana pound maktaduai 97.5 a hman ngam chhan chu a takin kan hmu nghal. Goal a khung bakah Arsenal tlarhnung a paldarh hneh thei hle, tun hma lam aiin a ṭha tawh zawk tih hrechiangtu chu Gunners defender-te kha an ni ngei ang.

Champion zia
Premier League season ṭan hma khan BBC pundit 20 ten champion tura an rin an sawi a, mi 13 zetin Manchester City an ring a, midang pasarih chuan Chelsea hi champion turin an ring - club dang chu champion tur zingah an dah ve lo.

Tuchel-a'n a enkawl chinah Chelsea hi an danglam a, season hmasa khan goal khung thei tak striker nei lo mah se Champions League nomawi an chawi thei, tunah chuan an mamawh tak Lukaku an nei ta, league champion an nih pawhin a mak lo ang.

Kar khat chhung training a neih tawh avangin Lukaku chu inkhel bul ṭantir a ni, Inter Milan striker hlui hian amah vengtu Pablo Mari nek bet chungin ball a khuap a, a hnunga awm Mateo Kovacic a pe - Kovacic hian mual sira awm Reece James a pe leh.

Vengtu nei lo James-a'n duh tawkin ball a cross thei a, a laia awm Lukaku chu Mari bawkin a ven hneh loh avangin hnai tak aṭangin goal a khung. An goal hnihna James-a'n a khung theih nan pawh Lukaku hian Granit Xhaka a paltlang.

Lukaku hian an goal thumna a khung theuh hle, hnai taka aṭanga a ball tauh chu keeper Bernd Leno-a'n a lo nem per hman hlauh, bar perin goal pawnah a kal. Kai Havertz khung tur pawh Leno bawkin a lo dansak bawk a ni.

Blues an ṭha
Chelsea manager Tuchel-a'n a player pawimawh N'Golo Kante a la dim a, France international hi second half-ah bench aṭangin a lut chauh. Kante awm loh karah Kovacic, Jorginho leh Mason Mount te an inkawp rem viau - mahse Kante a lo kir tak avangin Kovacic tan khelh phak a harsa dawn.

Tlarhma lama tlan ṭhin Hakim Ziyech, Timo Werner leh Callum Hudson-Odoi te bench-ah an awm. Lukaku a awm tak avangin Werner hian khelhna hmun a chang tam tawh lo mai thei, chutih rualin season a rei avangin beisei erawh a la nei thei ang.

Frank Lampard-a'n duhsak taka a lakluh Ben Chilwell pawh a bul ṭantu zingah a la tel phak lo, tun hma lama Premier League champion lo ni tawh Marcos Alonso-a'n hmun a chang leh tawh a, English defender tan khel phak tur chuan Tuchel-a rilru hmin khawpa beih a ngai dawn.

Tlarhnung lam pawh an ngaihtuah awm lo, tawnhriat nei ṭha Thiago Silva an chhawr rim duh lo a nih pawhin Andreas Christensen leh Antonio Rudiger te inkawpin match hnihah goal an chhuah lo a ni satliah lo a, an talbuai loh avangin coach a lungawi ang.

Chelsea hian champion turin player an nei ṭha tawk tih chu a chiang. An hmabakah Liverpool, Aston Villa, Tottenham leh Manchester City te an hmachhawn zawn dawn a, eng ang taka squad chhah leh ṭha nge an nih chu fiah a ni dawn.

Arsenal an pherh
English football inelnaah Arsenal hian season 118 an hmang ta, a hmasa lam 117 zetah hian an match hmasa pahniha chak lo chunga goal khung loh an la nei ngai lo - tunah chuan Arteta kaihhruaina hnuaiah record duhawm lo zet mai an siam ta.

Kai thar Brentford an ngam loh hnuah season hmasa lama vawi hnih an hneh Chelsea an hneh lo, an match lehpekah champion lai Manchester City an hmachhawn dawn, mualpho zui zel an duh lo a nih chuan a rang thei ang bera insiamṭhat an mamawh.

Emile Smith Rowe hnen aṭanga a ball hmuh Bukayo Saka-a'n a shot chu ṭha takin Edouard Mendy chuan a lo dansak a, pound makatduai 72 man Nicolas Pepe-a'n chak taka ball a tlan pui laiin fan-te thawm ṭha mah se, Blues lamin an vuak letnaah goal an khung.

Kieran Tierney chu tlarhma pui turin a tlan chhuak hnem a, a chhuah laiin mualsir lam lo ngaihventu an awm lo. Chelsea lamin goal an neih pahnihah James chu zalen thei hle. Arteta-a'n mualsir lam ven dan a ngaihtuah nawn a tum ngei ang.

Gunners hian Saka-a penalty hlawh chhuah loh an ui ang, defender Rob Holding-a ball tauh goal pawn chiah kal leh captain Pierre-Emerick Aubameyang-a shot keeper-in a dan te an sawizui thei ang, a khaikhawm nan erawh chuan Arsenal kha team ṭha lo zawk an ni.

" Season bul ṭanna duhthusam a ni, match hnihah goal chhuah lohin hnehna kan chang. London Derby-a kan chak hian inrintawkna tam tak min siam belh ngei ang. Player ṭhenkhat an chhuak a, ṭhenkhat an lo kir chauh. Kan ṭhat den bera khel chhuak tur chuan hun hmanho tam kan la mamawh,"
- Thomas Tuchel, Chelsea Manager

" Hun ṭha insiam ve mah ila kan ti hlawhtling thei si lo, a zawna chak loh chu thil ṭha lo tak a ni. Hun harsa karah pawh fans puihna kan dawng ṭha, an lawmna siam turin theihtawp kan chhuah ang. Zep thu a awm lo, kan inkhelah kha chuan team ṭha leh chak phu zawk chu Chelsea kha an ni,"
- Mikel Arteta, Arsenal Manager