Barty a chungnung ber

Ashleigh Barty chuan Jil Teichmann chu 6-3, 6-1 a hnehin Cincinnati Masters nomawi a chawi a, inrintawkna sang tak nen tun thla tawpa khelh tur US Open a hmachhawn chhunzawm thei dawn tihna a ni.

Australian nula Barty hian Tokyo 2020-ah khan beisei a phak lo, hneh nei loin a tla nghal. Japan khawpui aṭanga a haw hnuah tun ṭum hi inelna a hmachhawn lehna hmasa a ni a, duhthusama ṭhain a khel chhuak.

World number 1 hian nomawi chawi turin match ngaah hnehna a chang a, set hloh miah loin a khingpui a piang chu straight set hmangin a hneh vek - nomawi inchuhna inkhelah meuh pawh game li chauh hlohin, a service vawi khat bak a hloh lo hial.

Kum 25 mi Barty chuan, "Ka tan chuan chawlhkar duhawm bik a ni, match tin maiah kha hma ka sawn zel ni maiin ka hria. Inkhel entu an awm thei hian inkhelh a ti nuam em em a, nasa takin min pui," tiin a sawi.

Barty hian French Open leh Wimbledon title a la tawh. Hard court hi atan inkhelh nawmna hmun a ni lem lo, mahse tun hnaia a khelh ṭhat avang hian Grand Slam hnuhnung ber US Open atan pawh beiseina a neih san phah ngei ang.