Saints-in Man United an ngawihtir

Manchester United-in Premier League season ṭan nan Leeds United 5-1 in an sawp a, Inrinni zanah erawh Mason Greenwood goal hmangin Southampton nen 1-1 in an inhnehtawk hram.

St Mary's Stadium-ah Saints-in goal an khung hmasa a, minute 30-naah Che Adams ball pet chu Fred-a'n dang perin David de Gea tan dan ngaihna a awm lo.

Man United tan Greenwood-a'n minute 55-naah siphurh a sut a, chakna goal beiseiin pound maktaduai 73 man Jadon Sancho te luhtir mah se goal dang hmuh tur a awm tawh lo.

United an chesual
Ole Gunnar Solskjaer-a'n Leeds United an hneh ṭum aṭangin player pahnih a thlak a, Scott McTominay leh Daniel James te aia lut Nemanja Matic leh Anthony Martial te an khel ṭha lo ve ve.

Saints tlarhnungin Martial an dah ṭha a, Matic pawh a tikimtu ang chauh a ni a, a kawppui Fred a danglam tam lo. Leeds United lama hattrick siamtu Bruno Fernandes pawh goal an chhuah chhanah a mawhpuh theih bawk.

Portuguese midfielder Fernandes hian Jack Stephens lakah ball a hloh a, Saints defender hian Moussa Djenepo a pe a, Djenepo hian Adam Armstrong pe lehin a ni hian a lo flick zeuh a, Che Adams-a'n goal zawnah pet lo mah se Fred-a'n a dan per avangin goal kilah a lut.

Fernandes a ball khuap a na tawk lo a, United midfielder erawhin Stephens hi foul ngeiah a ngai thung. VAR rawn hnuah goal hi pawm a ni ta tho a, United captain hlui Roy Keane pawhin foul-ah a ngai lo. Keane chuan, "Foul-ah ka ngai lo. Fernandes khan ball khuap nan a taksa a la hmang tam tur a ni," tiin a club hlui a chhan lo a, captain Harry Maguire a sawisel bawk.

Maguire tihsual vangin Saints-in chakna goal khung theihna hun ṭha an nei a, Adam Armstrong chuan keeper David de Gea chiah a hmachhawn hnuah goal-ah a chantir thei lo a, Spanish keeper-in a dang ṭha ve bawk.

Fak tur a awm
Man United an khel ṭha lo a, player thar Jadon Sancho-a'n danglamna a thlen thei lo. Chutihrualin Paul Pogba erawh Leeds nena an inkhelh ṭum ang thoin a hmuhnawm a, kum 19 mi Greenwood pawhin goal khung thei player a ni tih a lantir leh bawk.

Pogba hian Greenwood-a'n goal a khung theih nan a thawh hlawk a, French midfielder hian box pawn chiahah Saints defender te bum kualin goal pawnah chiah a kal.

Bench-ah Real Madrid aṭanga an lakluh Raphael Varane a awm tawh a, August 29, Pathianni zana Wolves an tlawh hunah chuan French midfielder hi a khelh theih a rinawm. Man United-in point khat hlu tak an hlawhchhuah avangin Arsenal record siam Premier League khualmuala match 27 chhung hneh loh nei lo record chu an nihrual.

Solskjaer a thinur
Manchester United manager Ole Gunnar Solskjaer chuan, "Tuna inkhel an kalpui duh dan anga an kalpui zel chuan inhliam an awm dawn. Tun aia ṭha zawk ruahmanna a awm ka beisei. Bruno lakah khan an foul chiang a ni.

"Hlauhthawn tur phei chu a awm lo. Chutihrualin season liam ta kha chuan volleyball leh basketball ang maiin kan strict a, tuna rugby ang maia khelh hi a dik lo. Mipa football hmuh duh chi ka ni a, foul ham tam loh ka duh. Chutichung chuan goal an khungna kha chu foul a ni," tiin referee thutlukna a pawm loh thu a sawi.