Cincinnati-ah Zverev a champion

Alexander Zverev chuan a boruak ṭha a chhawn nung zel. German tlangval hian Andrey Rublev chu 6-2, 6-3 a hnehin Cincinnati Masters 1000 nomawi a chawi a, Grand Slam dawta inelna ngaihhlut Masters title hi vawi nga a lakna a ni nghal.

Kum 24 mi Zverev hian Tokyo 2020-ah an ram tan gold medal a vaw chhuak, hun rei vak lo chawlh a hman hnuah Cincinnati Masters a khel zui. Semifinal-a Stefanos Tsitsipas nen an inkhelh ṭuma set a hloh bak chu straight set hmangin a chak vek.

World number 4 Zverev chuan, "Hun rei lote chhungin nomawi ka hlawh chhuak der mai. Tournament hi kar khat chhunga khelh zawh a nih chuan hahchawlhna hun a awm ngai lo, chutiang kara ka hlawhtling thei hi ka lawm.

"Tunah chuan US Open atan rilru ka sawrbing thei leh tawh ang, tunlaia ka khelh ṭhat ang hi chhawmnun zel ka duh a, ka duh leh beisei ang ti hlawhtling turin theihtawp ka chhuah chhunzawm ang," tiin a sawi.

Zverev hi player ṭha tak ni mah se Grand Slam title a la chawi lo. Nikum khan US Open final a lut a, set hmasa pahnih a lak hnuah Dominic Thiem a ngam lo, kuminah hian a inlan a nih chuan champion tura rinkai a ni ang.

August 31 aṭanga khelh tur US Open-ah hian champion lai Thiem, Roger Federer, Rafael Nadal, Stan Wawrinka leh Juan Martin del Potro te chu hliam vangin an inlan thei dawn lo, world number 1 Novak Djokovic erawh a inlan dawn.