Rinkai Juventus an chak zo lo Jose Mourinho thawm a lian

Serie A champion tura rinkai Juventus chu an mikhualna ramah Udinese nen 2-2 in an inhnehtawk a, manager thar Massimiliano Allegri-a'n player ṭha Cristiano Ronaldo chu inkhel bul ṭan tur zingah a thlan tel loh avangin sawi zui a hlawh.

Jose Mourinho a nih tawh chuan boruak a danglam ṭhin. Portuguese manager hian a club thar AS Roma chu a league match hmasa berah 2-1 in hnehna a chanpui a, stadium chhunga mipui pungkhawm thawm a ring hem hem hle.

Juve an chelh
Pathianni zan Stadio Friuli-a inkhelah Juventus manager Allegri chuan tlarhma laiah Alvaro Morata a dah a, a sirah Paulo Dybala leh Juan Cuadrado ten an thlawp bawk - minute thumna leh 23-naah Dybala leh Cuadrado ten goal an khung.

Inkhel bul an ṭan danah Old Lady an lungawi a, an mamawh goal an nei hma bawk. Mahse, second half minute 51-naah goalkeeper Wojciech Szczesny-a penalty chawi chu Roberto Pereyra chuan khungin si phurh a sut ṭhen.

Darkar khat an inkhelh hnuah Morata la chhuakin Ronaldo dah luh a ni a, goal dang erawh an khung belh thei tawh lo. Hun tawp dawnah winger Gerard Deulofeu-a goal hmangin Udinese lamin si phurh an sut zo.

Hamrik hnuhnung a rik hma lawkin Ronaldo-a'n chakna goal tauh lutah a inngai, a goal hi jersey phelh meuhin a lawm. Mahse, VAR hmanga rei deuh tak endik a nih hnuah goal hi hnawlsak a ni a, 2-2 a inhnehtawkin inkhel an ṭin.

Allegri thutlukna
Juventus an chak zawh loh avangin chhuanlam tur an dap, media lamin zawhna an ngah bawk. Eng vangin nge Ronaldo-a'n inkhel bul a ṭan loh tih chu zawhna langsar tak a ni a, manager Allegri-a'n a thutlukna a nih thu a sawi.

Italian manager Allegri chuan, "Inkhelh ṭan hma khan Ronaldo hi bench-ah a ṭhut tur thu ka hrilh. Khelmual a luh hnuah erawh ṭha takin a khel a, a goal khung an pawm lo erawh a pawi hle," a ti. Ronaldo bakah hian player thar Manuel Locatelli pawh bench aṭangin a lut ve bawk.

Allegri chuan sawizawmin, "Season tir chauh a la ni a, eng ang boruak nge kan tawn dawn a la hriat vek loh. Player dangte ang bawkin Ronaldo pawh inkhel turin a inpeih, a bak chu sawi tur a awm lo. Tunah kan tihsual aṭang hian kan inzir ang," tiin a sawi.

Real Madrid forward hlui hian Juve tan tun season bak contract a nei tawh lo a, tun hnaiah chhuak tur angin thawm awm mah se amah ngeiin a chhuah loh tur thu a sawi tawh. Juve director Pavel Nedved pawhin Ronaldo cham tur thu hi a sawi nawn ve leh bawk.

Hello Mourinho
Stadio Olimpico-a inkhel entute chuan an manager thar Jose Mourinho hming an lam rual dual dual a, a laka beisei an neih sanzia leh an rintawkzia a ti lang chiang hle - stadium chung kila TV lianah Mourinho thlalak chu lian zeta tarlan a ni.

Roma tan Henrikh Mkhitaryan-a'n goal hmahruai khungin Jordan Veretout chuan goal hnih a nei, striker thar Tammy Abraham-a'n assist vawi hnih neiin a club thar tan bul a ṭan fuh hle, mikhual tana Nikola Milenkovic goal khungin awmzia a nei phak lo.

Fiorentina keeper Bartlomiej Dragowski chu minute 17-na lekah hnawhchhuah a ni a, Roma midfielder Nicolo Zaniolo chu second half minute 52-naah hnawh chhuah a ni ve bawk, inkhel a tawp chuan team pahnih hi kim lo chungin an khel ve ve thihna a ni.

Inter Milan a enkawl laia Serie A title vawi hnih la tawh Mourinho chuan, "Player 11 vs 10 inkhelh kha chu kan ṭhat dan ber a ni lo, 11 vs 11 emaw, 10 vs 10 emaw nih khan kan ṭhat dan ber a ni," a ti, a mize danglam tak kha a la paih lo.