Contract thar chungchangah Klopp a hmanhmawh lo

Liverpool-in an player langsarte chelh chhunzawm zel duha contract thar an ziahpui laiin coach Jurgen Klopp erawhin contract thar sawi hun a la nih rih loh thu a sawi - German coach hian kum 2024 thleng Anfield-a cham turin contract a nei.

Reds manager chuan, "Ka contract neih chhung hi rei tak a la ni a, sawi a ṭul pawhin ka la hre rih lo. Mi tam zawk chuan kar hnih thum hnua an awmna tur pawh an chiang lo a ni a, kum thum chhungin eng thil nge thleng ang sawi theih a ni lo," a ti a, contract thar sawi nan a la hma thu a sawi.

Germany coach hlui Joachim Low-a'n March-a German national team enkawl hna a chawlhsan tur thu a sawi khan Klopp hi Hansi Flick nen Germany coach ni tura sawi rik an ni a, Bayern Munich boss hlui Flick hian a zawm ta zawk.

Flick hian kum thum chhung atan contract a ziak a, kum 2024-a Klopp-a contract tawp rualin a contract a tawp ve dawn tihna a ni - Liverpool boss tan Germany enkawlna chance a inhawng zaua ngaih a ni.

Mahse, Klopp chuan, "Liverpool-ah kum 2024 thleng hun ka hmang a nih chuan kum khat dang chu hahchawlh nan ka hmang ang. Germany ka enkawl dawn a nih chuan Flick hian 2025 thleng Germany hi a enkawl a ngai dawn tihna a ni - kum 2024-ah chuan tumahin min biak buai a ngai lo ang," a ti a, Anfield-a a contract a pawtsei lo a nih pawhin kum khat tal chawlh a tum.

Kum 54 mi Klopp hian June 2015-a Borussia Dortmund a chhuahsan pawh khan thla thum vel chawlh a hmang zet a, October 2015 khan Liverpool enkawl hna a thawk ṭan.

Reds-a pan hnuah Premier League, Champions League, UEFA Super Cup leh FIFA Club World Cup nomawi a chawipui tawh a, Anfield-ah fan-te atchilh rawn a ni mek.

Tun season-a league match hnih an khelh aṭangin Liverpool hian goal nga khungin an lamah a la lut lo a, point ruk an nei mek - Inrinni zan dar 10:00-ah league match khel turin Chelsea an mikhual ang.