Kane telna Spurs an chak

Tottenham Hotspur-in Premier League nomawi chawi an tum tih an pholang chhunzawm zel a, Pathianni zan khan Wolverhampton Wanderers chu 1-0 in an hneh - league match hnihah a zawnin an chak ta.

Spurs goal awmchhun hi Dele Alli-a'n penalty aṭanga minute 10-na leka a khung a ni a, thla 17 hnua league match-a goal a khung leh hmasak ber a ni - coach thar Nuno Espirito Santo enkawlna hnuaiah a insiamṭha mek zel. Wolves boss hlui Nuno hi, "I hnathawh zawng zawng avangin i chungah kan lawm e," tiin fan-ten Molineux stadium-ah banner nen an lo lawm.

London club chhuahsan duhtu Harry Kane-a'n inkhel bul ṭan lo mah se bench aṭanga luhtir a ni a, Wolves keeper Jose Sa chet ṭhat zan ni lo se English striker hi goal khung thei dinhmunah a ding hial.

Spurs 'ta' Kane
Inkhelh zawhah Kane-a'n khualmuala ṭawiawmtu fans lam panin lawmthu sawi nan a kut a beng a, coach Nuno nen an inkuah bawk - Manchester City nena sawizawm an nihna erawh a bo phah lo.

Wolves fan-te chuan Kane hi, "Kane-a'n chhuah a duh," tih te, "Mi duham tak pakhat a awm a, naktukah chuan City player a ni dawn," tihtein an au el a, Spurs fans erawh Kane-a lam an ṭang tlat thung.

Spurs fan-te hian, "Keimahni zinga mi ngei a ni, " "Wolves pumpui aiin a hlutna a sang zawk," tihtein an striker hi an chhan a, hetianga in au elna ngaihnawm tak tak hi stadium-a fans tel theih hlutna belhtu a ni.

A chhuak dawn lo!
Spurs-in coach thar hnuaiah a zawnin hnehna an chang a, mahse, Kane chanchin lo chuan sawi a hlawh chuang lo. London club coach Nuno chuan, "Ngai a awh chho leh tawh a, hmasawn zel a la mamawh.

"Vawiinah khan kan team tan a ṭangkaizia kan hmu a, chance pawh duhawm tak a nei. Tunah chuan a fitness-in ngai a la awh loh avangin theihtawp a chhuah mek zel. Khawvela player ṭha ber pawl a ni a, ball chang tam tura team a puih dante kha in hmuh ka ring," a ti a, chhuah lam a sawi lo.

Nuno hian, "Ani ang player kan nei thei hi kan vannei hle a ni," tiin a sawi bawk a, Kane hi season khat dang a cham a nih pawhin a mak lo ang. Kum 28 mi striker hian inkhelh zawhah, "Hnehna lawmawm tak a ni," tiin twitter lamah a ziak.

Pep-a thu leh hla
Tottenham chairman Daniel Levy chuan Kane hi zawrhlai a nih loh thu a lo sawi tawh a, khawthlang media-ten an tarlan dan chuan pound maktaduai 150 chunglama dawrtu an awm erawh chuan Spurs hotupa hian chhuahtir a pawiti lo.

Kane rimtu ber City hian pound maktaduai 100-in Jack Grealish chu Aston Villa aṭangin an lalut tawh a, pound maktaduai 150 vel sen leh an inhuam ang em, tih chu zawhna awm thei tak a ni.

City boss Pep Guardiola chuan, "Sergio Aguero contract kan pawhsei loh khan zawhna tam tak a awm a, a thlaktu tur kan lak dan tur chu lei tur player an awm dan a zir a nih tur thu ka sawi. Kan lei mai thei a, kan lei lo mai thei bawk - transfer bazar khar nan ni 10 a la awm a ni," a ti a, Kane an la ngaihven reng niin a lang.