Zaninah Champions League khel tur zawnna

UEFA Champions League khel tur zawnna playoff chu zanin hian khelh chhunzawm a ni dawn. Group stage-ah hian team 26 an awm tawh a, hmunruak paruk hi playoff hmanga hnawhkhah tur a ni.

Benfica chuan zanin dar 12:30 hian Philips Stadion-ah PSV an hmachhawn dawn a, first leg-ah Portuguese club ṭha hian 2-1 in hma an hruai. Tun season Europe inelnaah away goal rule paih bo a ni a, Dutch club hi goal khata an chak thung chuan extra time khelh a ni ang.

Inkhel dangah Hungarian champion Ferencvaros leh Swiss champion Young Boys bakah Bulgarian champion Ludogorets leh Swedish champion Malmo te an inkhel bawk dawn.

Champions League draw hi August 26, Ningani zan dar 9:30 hian Istanbul, Turkey-ah neih a ni dawn. Hemi hunah hian UEFA Player of the Year leh Coach of the Year bakah season liam taa Champions League-a position ṭha ber thlanchhuahte puan an ni dawn.

Group stage-ah hian Atletico, Real Madrid, Barcelona, Sevilla, Villarreal, Manchester City, Manchester United, Liverpool, Chelsea, Bayern, Leipzig, Dortmund, Wolfsburg, Inter Milan, AC Milan, Atalanta, Juventus, Lille, PSG, Sporting, Porto, Zenit, Club Brugge, Dynamo Kiev, Ajax leh Besiktas te a an lut tawh a ni.