Bale goal khung zanah Real chak zo lo

Kum 2019 hnua a vawi khat nan Gareth Bale chuan La Liga-ah goal khung mah se a team chhandam nan a tawk zo lo a, Real Madrid-in khualmualah 3-3 in Levante an inhnehtawkpui.

Real tan Bale-a'n goal khat a khung bakah Vinicius Jr chuan goal hnih a khung ve bawk a, khualmuala goal thum zet an khung hian point thum a hlawhchhuahpui zo lo.

Levante tan Roger Marti, Jose Campana leh Rober Pier ten goal khat ṭheuh an khung a, Levante goalkeeper Aitor Fernandez chu minute 87-naah hnawhchhuah a ni bawk.

Atletico Madrid chuan Angel Correa goal khung hmangin Elche chu 1-0 in an hneh ve a, Inrinni zan khan Barcelona-in 1-1 a Athletic Bilbao an lo inhnehtawkpui tawh avangin La Liga club lian pathum zingah match hnih khelh aṭanga point ruk hmu thei awmchhun chu Atletico chiah an ni.

A hming Bale
Kum 2018-a Cristiano Ronaldo-a'n Real Madrid a chhuahsan dawn khan club president Florentino Perez-a'n Real player awm tawh zinga ropui ber ang hiala ngaih hi chhuahtir phal chhan a nei a, Bale-a'n a hmun ruak a hnawh khah theih a rin vang a ni.

Mahse, hliamin Bale a kiansan lo a, Zinedine Zidane-a'n Real coach hna a chelh hnuah phei chuan hmun a chang mumal lo chho zui - season hmasaah phei chuan Tottenham Hotspur lamah loan-in khelhtir a ni.

Kuminah Real-in coach atan Carlo Ancelotti an la kir a, Italian coach hnuaiah Bale hian hmun pawimawh a lo chang tawh ṭhin - Real a enkawl vawi hnihnaah pawh 'King Carlo' hian Bale a la rintawkzia a pholang nawn a, league match hmasa pahnihah bul a ṭantir ve ve.

Levante lakah Bale-a'n a pu rinna a chhanglet a, minute ngana lekah fing takin goal hmahruai a khung - September 2019 hnua La Liga-a a goal khung hmasa ber a ni a, Welsh forward-in beiseina thar a nei.

Mahse...
Levante khelmualah Real-in awlsam takin goal hmahruai an khung a, awlsam taka chak tura ngaih an ni hman - Levante ngaihdan a dang thung. Second half ṭan aṭanga second 30 pawh a ral hmain Marti chuan si phurh sutna goal a rawn khung a, an duhtawk mai lo!

Real-in an chhanlet hmain Levante bawkin goal an khung nawn a, Jorge de Frutos-a cross aṭanga ball kal chu Campana chuan mawi zetin a lo volley a, goal chung kil sirah kalin Real keeper Thibaut Courtois tan tih theih a awm lo - goal ṭha bik a ni.

Minute ngana leka 1-0 a hmahruaitu Real kha second half an khelh meuh chuan a hnufual zawkah an ṭang a, Ancelotti-a'n player siksawi a ngai tih a hai lo - Isco, Bale leh Eden Hazard a la chhuak a, Marco Asensio, Rodrygo leh Vinícius Júnior a luhtir.

Ancelotti-a'n thutlukna a siam sual lo - minute 73-naah Vinicius chuan si phurh sutna goal a rawn khung a, 2-2 a ni. Mahse, Real tlarhnung a nghing tel tlat . Freekick aṭanga ball kal chu David Alaba-a'n a dang per a, Pier-a ke bulah tak a tla. Kum 26 mi centre back hian hnai set sawt aṭangin goal-ah a chantir zui.

A tawpah chuan
Pier-a'n goal a khung hnuah 3-2 in Real an hnufual a, khualmualah an tlawm dawn niin a lang hman. Mahse, Vinicius bawk a inlar leh a, Brazilian forward hian hun tawp nan minute nga chiah a awm tawh tihah si phurh sutna goal a khung.

Kum 21 mi Vinícius hian season hmasa khan league match 35 khelin goal thum chiah a khung a, tun season-ah erawh league match hnih aṭangin goal thum a khung tling ta der - kum 2018-a Real a pan hnua season khata goal ruk aia tam la khung ngai lo forward hian goal tam zawk khung zel a beisei ang.

Vinícius-a goal khung hnuah goal dang lut tawh lo mah se ennawm dang en tur a la awm cheu - Levante keeper Aitor Fernandez chu yard 20 vela hla tlan chhuakin Rodrygo-a'n a tlanpel tur chu a kutin ball a tawk a, red card pek a ni.

He thil a thlen hian hun tawp nan minute thum a la awm a, defender Ruben Vezo chuan goal a veng zui. Mahse, Real-in a tam zawk an nihna chu an chhawr zui lo a, point khata lungawi zir chungin Levante mual an ṭinsan.