League Cup: Premier League club inlan hun

English football inelna ngaihven hlawh zinga mi Carabao Cup, League Cup tia hriat lar chu zanin aṭang hian second round khelh ṭan a ni dawn a, Premier League club-te inlan hun a thleng ve ta tihna a ni.

League Cup first round-ah hian League Two club 24, League One club 24 leh Championship club 22 te an inel ṭhin a, first round-a chak team 35 chu second round-ah Premier League club 13 leh Championship club pahnihin an lo zawm ve leh ṭhin.

Premier League club 13 hi European football inelna hmachhawn lo ho an ni a, Championship club pahnih hi a hma season Premier League-a 18 leh 19-na te an ni - kuminah chuan Fulham leh West Bromwich Albion tihna a ni.

Zanin dar 11:30-ah league match hmasa pahniha goal riat ngawt chhuahtu Norwich City an inlan dawn a, Championship club Bournemouth an mikhual dawn avangin an season bul ṭan dan duhawm lo thai bo nan hman an tum ang.

Brighton & Hove Albion-in Premier League-a an match hmasa pahnihah hnehna changin season bul an ṭan ṭha viau a, zanin dar 12:15-a Cardiff City an lenchilh hunah pawh hnehna chan an inbeisei dawn.

Zanin dar 12:15-a Aston Villa-in an lenchilh tur Barrow A.F.C hi League Two club an ni a, Villa tan awlsam taka chak theihna tura ngaih an ni.