Ligue-ah buaina a chhuak

Pathianni zan French Ligue 1 inkhelah buaina a chhuak a, Nice leh an mikhual Marseille te chu an inkhel zo thei lo. Marseille president Pablo Longoria chuan an player-te chu beih an neih bakah hliam tuar an awm thu a sawi.

Allianz Riviera-a inkhelah Nice tan Kasper Dolberg chuan goal khat khungin hma an hruai. Corner pet tura kal Dimitri Payet chu pawn lam aṭangin a hnungah bottle-in an lo vawm a, midfielder Payet hian an vawmna hmang chuan a vawm let.

Inkhel entu fans chu khelmualah tlan luh tumin an buai zui a, khelmual sira vengtuten lo dang mah se an buai chhunzawm. Hun rei tak chhung inkhel a khaihlak hnuin Nice chuan khelh zawh an duh a, mahse Marseille erawh an khel zui duh tawh lo.

Buaina chhuak vang hian inkhel hi minute 75-naah tih tawp lailawk a ngai, an buai hun chhung hi darkar khat chuang a ni hial. Khelmual an chhuahsan dawn pawhin buaina hi a la reh lo, Marseille coach Jorge Sampaoli chu venhimna pek a ngai hial.

Marseille hian an match hmasa zawka Montpellier 3-2 a an hneh ṭum pawhin buaina an lo tawk tawh. Minute 89-naa Marseille substitute Valentin Rongier-a corner pet tur chu a luah an lo vawm fuh tawh bawk a, Nice nen an inkhelh pawh hian Payet an vawm fuh hma pawhin khelmualah tui bottle an vawm lut nual a ni.