FC Goa coach nih duh - Dunga, Hiddink, Eriksson!

Indian Super League club FC Goa-in coach nih duh an zawng a, an beisei aia tam diltu an awm - diltu an tam a ni mai lo a, khawvel huapa coach hriat hlawh Dunga, Guus Hiddink leh Sven-Goran Eriksson te chu he hna dil zingah hian an tel!

Spanish legend Fernando Hierro leh Manchester United defender hlui Jaap Stam chu hna dil zingah hian an tel bawk a, Indian football-in khawvel ngaihven a hlawh ve ṭan ta niin a lang. 

Kum 56 mi Dunga hi Brazilian legend tia chhal ngam a ni a, player a nih laia defensive midfielder thiam hmingthang hian an ram club Internacional leh Brazil a lo enkawl tawh.

Brazil hi vawi hnih a enkawl a, Copa America, FIFA Confederations Cup-ah te champion nomawi a chawipui a, World Cup 2010-ah quarterfinal a luhpui a, player a nih laiin World Cup nomawi chu 1994 khan Brazil captain nichungin a lo chawi tawh bawk. 

Kum 73 mi Hiddink hi khawvel coach ropui zinga chhiar tel tlak khawpa hlawhtling a ni a, kum 2002 World Cup semifinal-a South Korea-a hruai thlen kha football chanchin ngaihnawmah chhiar hmaih a ni ngai lo. 

Dutch club ropui PSV Eindhoven chu 1987-88 season khan treble champion a nihpui a, Ducth league, Dutch Cup leh European Cup-ah champion nomawi a chawipui vek a ni. 

England boss hlui Sven-Göran Eriksson hi hming langsar tak ni mah se a hna hnuhnung lamah hlawhtlinna sawi tur a nei tlem a, nikum lama Philippines a enkawl kha a hna hnuhnung ber a ni. 

Player a nih laiin Fernando Hierro hlawhtling mah se coach ang erawhin tawnhriat a ropui lo - Real Madrid assistant coach a lo ni tawh a, World Cup 2018-ah khan Spain coach Julen Lopetegui chu a hma ni hnihah ban a nih avangin Spain a lo kaihruai tawh bawk. 

Kum 47 mi Jaap Stam hi United fans zingah hre lo an tam kher lo ang - defender ṭha bik niin United tan league nomawi pathum leh Champions League nomawi pakhat a lo chawi tawh. Inkhelh a chawlhsan hnuah coaching lamah kalin Reading, PEC Zwolle leh Feyenoord a enkawl tawh a, player a nih lai angin a hlawhtling zui lo. 

FC Goa hian kum 2014 khan Zico chu an coach hmasa ber atan an lo lalut tawh a, Brazilian legend hian 2016 thleng Goan club hi a enkawl - a chhuah kum hian thla nga chhungin vaibelchhe 6.3 a hlawh. Tun season-a an ban tak coach Sergio Lobera kha a hlawh zat tarlan ni chiah lo mah se ISL-a coach hlawh hnem ber pawl nia sawi a ni a, FC Goa hian pawisa an nei tih a chiang. 

FC Goa neitute hian coach langsar tak takin an club enkawl an dil hi mak an ti a, he hna hi an duh tak tak nge, an dil ve hrim hrim tih chu FC Goa thuneitute rilrua zawhna awm a ni. Dunga aiawhtu pakhat chuan, "Indian football hi a ṭhiante hnen aṭangin a hre ṭhin a, FC Goa hi a club hriat awmchhun an ni thung," tiin a sawi a, Dunga chu a hna dilah a 'serious' thu a sawi. 

He thu buatsaih a nih thleng hian FC Goa lamin thuchhuah mumal an la siam lo a, mahse Goan club chhungkua hrechiangtu pakhat chuan hming langsar tak takin an dil avangin FC Goa lawm mah se hming langsar lakluh tumna an nei lo niin a sawi. FC Goa hian coach naupang leh viak ṭha, club-in kalphung an neihsa kalpui thei tur an duh - hming langsar tan chance a awm lo tiin a sawi theih. 

FC Goa hian an club enkawl diltu coach aṭangin hming 37 an chhawp chhuak a, an chhawpchhuah zingah hian coach langsar ho hi an tel tho. Anni piahlamah hian ISL leh I League nomawi lo chawi tawh coach pawh an tel a, an hming erawh tarlan a ni lo. 

European football-a division hniam lama lo hlawhtling tawh coach-te hming pawh a lang a, FC Goa hian Europe lam an hawi a rinawm ber.