Hmeichhe tennis chawlh hun pawt sei

Women's Tennis Association (WTA) chuan April 20 thleng inelna neih loh tura an tih tawh chu an pawt sei a, hmeichhe tennis thuneitu sang ber hnuaiah hian May 2 hma chuan inelna neih a ni dawn lo.

Coronavirus vangin tennis player an chawl mek, player langsar zingah hri leng kai hmuh chhuah la awm chiah lo mah se entu leh staff zingah kai an awm a, awlsam taka inkai darh theih a nih avangin tournament neih a him rih lo.

Chawlh hun pawh sei a nih takah chuan Stuttgart, Istanbul leh Prague-ah te inelna an nei thei dawn rih lo tihna ni a, European clay court tournament zingah chuan - Madrid, Rome leh Strasbourg te chu neih theih beisei a ni thung.

WTA chuan thuchhuah siamin, "2020 WTA Tour season chu beisei angin a kal thei rih lo, a rei lo berah pawh May 2 thleng kan chawl phawt ang. Chawlh lai hian Covid-19 dinhmun ngaihchan reng a ni dawn a, thu thar a awm leh a nih chuan a rang lama puanzar zel a ni ang," an ti.