Salah hming lam a bang thei lo
Liverpool chak thu sawi a nih ruala lam tel ngai ṭhin chu Mohamed Salah hming a ni. Inrinni zan khan Liverpool chuan an mikhual Newcastle United 2-0 in an hneh a, Salah-a'n goal khat a khung.
Champions League khelh tum Tottenham Hotspur tan Son Heung-min-a'n goal hnih khungin Huddersfield Town chu 2-0 in an hneh bawk a, Harry Kane-a'n assist nei mah se goal a khung ve lo.
Salah goal khung zanah Kane-a'n goal a khung loh avangin Champions League khelh tum inum boruak karah Premier League top scorer ni tur inum chanchin a ngaihnawm tel–Salah leh Kane ten goal 24 ve ve an khung tawh a, season tawpa goal khung hnem tur zawk a la chiang lo.
Team hmuhnawm
Liverpool-in an chance ṭha vawi tam an hlah hnuah an mamawh chhanna chu Salah bawk a ni a, Egyptian forward hian Alex Oxlade-Chamberlain hnen aṭanga a ball hmuh chu minute 40-naah goal hmahruai ni turin a khung. Salah goal khungna kawngah Chamberlain chu fak phu a ni.
Anfield-a inkhelah Reds manager hlui Rafael Benitez-a enkawl Newcastle an bet a, minute 55-naah Liverpool-in Sadio Mane hmangin an goal hnihna an khung. Senegalese forward goal khung hi Reds-in Jurgen Klopp hnuaia top flight goal 200 an khung tlinna chiah a ni a, Premier League home match 22-a a zawna an tlawm lohna nem nghettu goal a ni bawk.
Liverpool-in Salah hmangin an goal thumna khung turin hun remchang nei mah se Chelsea winger hluiin goalkeeper chiah a hmachhawn hnuah Jamaal Lascelles chuan a nam thlu niin a lang. Klopp chuan, "Red card chiang tak a ni," tiin sawi mah se referee ngaihdan erawh a dang thung.
Salah zunzam
Chelsea hmanga a lo hlawhchham tawhna hmunah Salah-a'n hnehna hlado a chham mek a, Egyptian forward hming hi kan la lam dawn chauh niin a lang–Reds tan tun season-a match 38 a khelh aṭangin goal 32 a khung tling tawh.
Liverpool hneh tak Newcastle nen kan khaikhin dawn a nih chuan Magpies hian tun season-ah an squad pumpuiin goal 31 chiah an la khung a, Salah-a'n a khung hnem zawk tihna a ni. Klopp chuan, "A goal khung leh assist engkim mai hian min tilawm a, he player hi chuan min hneh a ni," tiin Salah zuna a uai thu a pha lo.
Anfield-a inkhelah Liverpool fan-ten 2005 Champions League-a ropui taka lo champion pui tawhtu Rafa Benitez chungah an zahna an lantir a, Magpies manager chuan, "Liverpool fans chungah ka lawm a,ka chungah an ṭha em em a ni," tiin lawmthu a sawi.
Fapa rangkachak Son
Tottenham-in hnehna an chanin Kane hming lam rik a ni ṭhin a, Inrinni zan inkhelah erawh Son Heung-min chu player langsar ber a ni–South Korea international hian minute 27-na leh 54-naah goal a khung a, Spurs a chakpui.
Kane-a hliahkhuhna hnuaiah Son hming lamrik hmaih ni ṭhin mah se London club tana a ṭangkaina hi hliahkhuh reng theih a ni lo–season hmasa khan goal 21 a khung a, tun season-ah goal 15 ngawt a khung tling leh ta.
Spurs-in Premier League match 11 chhung tlawm hmel an hmu ta lo a, heng zinga match riatah hian hnehna changin Spurs manager Mauricio Pochettino erawh a ṭawng pawr duh lo. Europe mi ni lo zinga Premier League match 100-a chak thei awmchhun coach chuan, "Nimina thil thleng ka ngaihtuah lo a, naktukah eng nge lo thleng dawn tih ka thlir ṭhin," a ti.
Mahrez goal a mawi
Leicester City tan Riyad Mahrez-a'n injury time-ah freekick hmangin goal ropui a khung a, Bournemouth nen 1-1 in an inhnehtawk. Cherries hian Joshua King penalty hmangin goal hmahruai khung mah se Mahrez hian yard 25 vela hla aṭanga freekick hmangin hun pek belhah a sut a ni.
Relegation zone aṭangin Swansea City an tal chhuak a, an mikhual West Ham chu 4-1 ngawtin an sawp–Welsh club tan Ki Sung-yueng, Mike van der Hoorn, Andy King leh Jordan Ayew ten goal khat ṭheuh an khung a, Hammers tana Michail Antonio-a'n goal a khung ve meuh chuan Swans hian goal li an khung fel der tawh.
Watford chuan an mikhual West Brom 1-0 in an hneh a, Baggies hi table mawngphahah an la awm chhunzawm zel. West Brom manager Alan Pardew chuan a dinhmun a him loh thu a pha lo a, season tawpah Baggies manager a ni tawh lo a nih pawhin a mak lo ang.