World Cup-ah VAR an hmang dawn?

Football dan siamtu International Football Association Board (IFAB) chuan Inrinni khan Zurich-ah ṭhukhawmin video assistant referees (VAR) chu football nena kalkawp zel turin an pawm. Kumin FIFA World Cup-ah VAR hman a ni ang em tih chu March 16-a inhmuhkhawm leh hunah tihchian a ni ang.

FIFA president Gianni Infantino chuan, "Vawiin aṭang chuan video assistant referees hi football-ah a bet tel tawh ang. VAR-ah hian beiseina sang tak kan nei a ni," tiin a sawi.

Tun hnaiah VAR thutluknaah sawiselna a awm ṭhin a, hemi kawngah hian hmasawn chhoh zel tum a ni. Fifa football technology innovation-a hotu Johannes Holzmuller chuan, "World Cup-ah chuan referee-in thutlukna a siam zawhah mipui hmuh theih turin thutlukna siam tura referee leh VAR te video hman chu phochhuah ve tum a ni," tiiin a sawi.

VAR hi nikum khan FIFA Confederations Cup-ah hman a ni tawh a, hei bakah hian Serie A, Bundesliga, Major League Soccer, Australia rama inelna A-League leh Portuguese Primeira Liga-ah te hman a ni tawh a, England lamah chuan knockout inelnaah hman a ni tawh thung.