Tuikual South-in an 'Bye Bye' hmasa
Second kua chiah a awm tawh tihin Tuikual South tan R. Lalmuanpuia'n freethrow vawi hniha pakhat zawk lutin 60-59 in hma an hruai a, Mission Veng Vikings-in 'time out' la nghal mah se an hun ṭha neih an hmang ṭangkai lo. Mizoram Super League season lina semifinal game 1-ah TKS point khatin an chak.
Zirtawpni zana inkhel tawp rual hian Tuikual South mipuiin an kut phar chhuak nghalin Mission Veng mipui ṭhutna lam hawiin an bye bye nghal. Hei hi bye bye hmasa a ni a, March 9 zan hian Hawla Indoor Stadium-ah an inhmachhawn leh dawn. Semifinal game 2 hi 'Bye Bye Inkhel' tawpna a nih theih avangin entu an tam ang.
Intum tawk
First quarter-ah Lalnunpuia Renthlei (R-a) hoin Tuikual South an khel ṭha hret a, 15-12 a ni. Second quarter-ah Vikings tan Zonunmawia rawn che ṭha ve thungin TKS tan Lalfakmawia a langsar a, half time-ah Tuikual South-in 25-24 in hma an hruai a, an chungnunna hi point khat lek a nih avangin ngaih ṭha taka awm theih a la ni lo.
Team pahnih te hi MSL4 match hmasa bera an intawn ṭum pawhin an inhnehtawk a, hun tawp dawn thlengin chak zawk tur hriat a ni lo a, hemi ṭum hian MSL champion lai Vikings chu 64-59 in an chak hram. Semifinal game 1-ah pawh second half-ah ennawm hmuh tur a awm tih a hriat theih.
Vikings an kal fawr
Third quarter-ah Tuikual South-in quarter hmasa lam ang thoin point 12 an tlin laiin Vikings erawhin point 23 an hmu chho daih.
Vikings tan Michael F. Lalawmpuia chuan third quarter-ah hian point 10 nei phain Moses Zoremmawia'n a thlawp ṭha a, Zonuna'n buzzer beat nan 3-pts a rawn luh bawk avangin third quarter zawhah champion lai hi point 10-in an fal.
R-a te pahnih
Hollow aṭanga TKS zawmtu Bungkawn tlangval R-a rawn langsar nawnin fourth quarter-ah ringawt point 12 zet a nei a, minute thum chauh a awm tawh tihin an point a intluk chho leh tawh.
Team pahnihin hun pawi-mawhah freethrow luh an harsat a, hei vang hian player-te'n pressure an ngah phah hle. Second kua chiah a awm tawh tihin Zonuna'n hemi match-a freethrow la lut lo Chawnpui tlangval R-a lakah a foul a, point dinhmun chu 59-59 a ni.
R-a (Muanpuia) hian freethrow hmasa zawk a lut a, chak theihna point a nih rualin a vawi hnihna a la luh loh avangin Vikings tan chak theihna kawng a inhawngah ngaih theih a ni bawk. Time out awm zuiin TKS coach KC Lalliantluanga chuan, "Tumah foul loh tur. Tumah open shot pek loh tur, contest vek tur, rebound chuh vek tur. Theihtawk bak chhuah a ngai," tiin a naute a fuih a, freethrow pek an tum lo.
Tuikual South an vannei a, Vikings guard Michael F-a'n huaisen takin a tawnhriat neihna nen lalut mah se basket a nei lo, Lalruatkima Sailo-in a 'tip' lut lo. Mission Veng zawkin inbound chang lehin Zonuna'n second tlem la awmah 3-point aṭangin attempt nei leh mah se a lut lo a, Tuikual South point khatin an chak.
Inchhuang tur an awm lo
TKS coach KC-a chuan, "Kan chak hram a, inchhuang tur kan awm lo. Kan vannei a ni. Anni zawk pawh kha chak se an hnehna chan avangin an inchhuan bik ka ring lo," tiin an vanneih zawk thu a sawi.
Vikings manager H. Lal-hruaitluanga chuan, "Inkhela danglamna chu freethrow a ni a, kan hlah tam mah mah a ni. Hetah hian hma kan sawn a ngai a, kan vanduai zan a ni," tiin Vanglaini a hrilh.