Ronaldo leh Bale hoin Real an chak

Real Madrid-in rin loh taka Espanyol an ngam loh hnuah chak result nen an rawn kir ve leh ta–Cristiano Ronaldo goal hnih leh Gareth Bale goal khung hmangin Getafe chu 3-1 in an hneh.

Season ṭantirah beisei a phak loh avangin Ronaldo-a'n sawisel a hlawh a, mah se kum 33 mi striker hian a theihna a la ngai reng tih pholangin tun season-a match 32 a khelhah goal 30 a khung tling leh der tawh! Bale pawhin hliam vanga a khel tam lo chungin goal 11 a khung tling ta bawk.

Spanish champion hian Thawhlehni zanah Paris St-Germain nen Champions League last 16 second leg an khel dawn a, an rilru tiharh tura chak result an mamawh lai taka hnehna an chang hi coach Zinedine Zidane tan chuan thawk huaina tham a ni ngei ang.

BBC hoin...
Zidane-a'n Espanyol laka an tlawm ṭumin Ronaldo chu squad-ah a dah tel lo a, bench-ah Karim Benzema a dah bawk. Zidane-a'n a tihsualna ngaia chetsual nawn a duh lo a, BBC tia hminglem an pek Benzema, Bale leh Cristiano ten inkhel bul an ṭan vek.

Real-in minute 24-na lekah goal hmahruai an khung nghal a, goal khungtu hi Bale a ni–Welsh forward hian post a pet per bawk a, Arsenal aṭanga Getafe lama loan-a khel goalkeeper Emiliano Martinez chuan ṭha zetin vawi khat a dan sak bawk.

Ronaldo-a'n first half hun pek belhah an goal hnihna a khung. Getafe tan Francisco Portillo-a'n penalty hmangin an si phurh sut ṭhen mah se Ronaldo bawkin Real goal thumna a khung leh a, Madrid khaw club an chak chiang. Ronaldo goal khung pakhat chu foul vangin pawm a ni lo a, Martinez-a'n ṭha zetin vawi khat a dan sak bawk. Dani Carvajal-a'n a chance neih a khung lo kha a ui ve khawp ang.

Ronaldo leh 300
Kum 33 mi Ronaldo-a'n goal hnih a khung avangin La Liga-ah goal 301 a khung tling taa, heti zat goal khung tur hian match 286 bak a mamawh lo–Lionel Messi-a'n La Liga-a goal 300 khung tling tura a mamawh zat chu match 334 a ni.

Hriat tel sak atana ṭha erawh Messi hian player naupang te nichungin La Liga a khel ṭan a, Spain-a a pem chuan Ronaldo hi khawvela footballer manto ber a ni tawh. La Liga pumpuiah erawh Messi a la ropui fal nalh a, goal 372 a nei tawh. Messi-a'n goal a la khung ve reng bawk si avangin Ronaldo tan chuan Argentine forward goal khung zat umphak erawh a harsa ang.

Ronaldo-a'n Getafe a ngam hrim hrim–anmahni ang thoa Madrid khaw club lakah hian goal 22 ngawt a khung tawh a, Sevilla laka goal 25 a khung tih lohah chuan Getafe hi Ronaldo goal khung theih berna hmun a ni.