Neymar an zai hlawhtling

Footballer manto ber Neymar-a ke rek hliam chu Inrinni khan Brazil-ah zai a ni a, amah zaitu Brazil team doctor Rodrigo Lasmar chuan hlawhtling taka an zai thu a sawi.

Kum 26 mi Neymar hi February 25 zana Marseille nen an inkhelh ṭumin a hliam a, Paris St-Germain chuan an forward hi chawlhkar ruk hnu velah a rawn kir theih beisei mah se amah enkawl tute nen an ngaihdan a inang lo.

Brazil team doctor Rodrigo Lasmar chuan, "Neymar hi thla thum chhung vel chu a chawlh a ngai mai thei," tiin a sawi a, tun season chhungin PSG tan a inlan a rin tawh loh thu sawiin FIFA World Cup erawh a khelh a beisei thu a sawi bawk.

Neymar awm loh hlanin PSG hian Inrinni zan khan Troyes an lenchilh a, Angel di Maria leh Christopher Nkunku te goal hmangin 2-0 in hnehna an chang.

Unai Emery-a'n Champions League lamah Real Madrid nen an inkhelh tur hre ranin striker rinrawl Edison Cavani chu a hahchawlhtir a, hliam tenau nei Kylian Mbappe chu squad-ah a tel lo bawk.

Ligue 1 hmahruaitu tan hian Timothy Weah chu a vawi khat nan a inlan, Weah hi PSG leh AC Milan striker hlui, tuna Liberia president ni mek George Weah fapa a ni a, a pa in PSG tana a match hnuhnung ber a khelh aṭanga kum 23 hnuah a rawn inlan ṭan ve leh chiah a ni.

Zirtawpni zan khan champion lai AS Monaco chuan Bordeaux 2-1 a hnehin PSG nen an inthlauhna an ti zim. Mahse, Paris club-in hnehna an chan ve leh tak avangin an inkarah point 14 a awm leh ta.

Emery naute hian point 74 an hmu tawh a, league match khelh hmabak 10 an la neih aṭangin point 17 an hmuh belh thei a nih chuan Monaco lak aṭangin nomawi an chhuhsak thei dawn a ni.