Napoli chak loh niah Juventus vannei

Italian champion nih tuma inum boruak a sang a, hun pawimawhah champion lai Juventus an che fuh leh ta. Inrinni zan Serie A inkhelah hmahruaitu Napoli an tlawm laiin Juventus erawhin hun tawp dawna Paulo Dybala goal khung hmangin Lazio lakah hnehna an chang thung.

Hliam vanga Gonzalo Higuain inlan theih loh zanah Argentina tana a khelhpui Dybala chu player langsar a ni. Lazio mualah Juevntus an chak zo dawn lo ngei niin a lang tawh, mahse hun pek belh minute thumnaah kum 24 mi Dybala chuan Lazio defender Luiz Felipe ball tih per chu a khung a, Turin club tan point thum a hlawh chhuak.

Juve manager Massimiliano Allegri chuan, "Tlarhma lamah player ṭhenkhat an inhliam a, chutichung chuan Olimpico-ah ṭha takin kan khel thei. Kan khingpuite khan tharum an ngahin min veng uluk hle a, a tawpah Paulo khan kan mamawh chhanna min pe thei ta tho a ni," tiin a sawi.

Turin club hian Nilaini zanah Champions League last 16 second leg khel turin Tottenham an lenchilh leh dawn, Spurs nen hian match hmasa zawkah 2-2 a an inhnehtawk tawh avangin khualmualah goal khung ngei an ngai dawn a ni.

Italian manager Allegri chuan, "Tottenham leh Lazio chu khaikhin theih a ni lo. Spurs chuan an goal an venhim ṭhat bakah min nawr na tel bawk a, inkhel awlsam a ni dawn lo tih chu a chiang. Kan khelmualah goal hnih kan chhuah avangin kan hna a hautak tawh dawn a, chutihrualin huaisen takin kan hmachhawn dawn tho," tiin Champions League a thlirlawk nghal.

Napoli an tlawm
Kum 1990 hnua a vawi khat nana Serie A champion nih tum Napoli chu AS Roma lakah 4-2 in an tlawm. Napoli hian minute rukna lekah Lorenzo Insigne hmangin goal hmahruai an khung a, harsa lutuk loin an chak thei tura ngaih a ni.

Amaherawhchu, khualmualah Roma an zam lo, goal an chhuah aṭanga minute khat hnuah tun hnaia khel ṭha tak mai Cengiz Under hmangin an sut nghal; Manchester City striker hlui Edin Dzeko-a'n goal hnih a khung belh bakah Diego Perotti chuan goal khat a thawh ve bawk–Napoli tan Dries Mertens-a'n hun tawp dawnah goal khung ve leh mah se awmzia a awm phak tawh lo.

Napoli hian league match 27 khelhah point 69 hmuin table-ah hmahruaitu an la ni a, mahse an hnuai chiaha awm Juventus nen an inkarah point khat chiah a awm–Turin club hian match khata an la khelh tlem zawk avangin hmahruaitu nih theihna hun an nei thei dawn tihna a ni.

Napoli manager Maurizio Sarri chuan,"Goal khung tumin vawi 26 kan pet a, chung zinga 13 chu goal zawnah a kal, chuti chung chuan kan mikhual lakah chiang takin kan chak lo. Ka naute khelh dan kha ngun taka ka ennawn ngei a ngai a ni," tiin a sawi.

Beisei an la neih thu sawi zuiin Sarri chuan, "Juventus-in hnehna an chang tih hre lawkin kan inkhel a, anni inkhelh hnua match neih leh hi chu a awlsam ngai lo. Tun ṭuma kan tihsual aṭang hian kan inzir ang a, match lehpekah chuan point thum hmuh kan tum ang," tiin a sawi. Napoli hian an match lekpekah chuan Inter Milan an hmachhawn dawn a ni.